گورنر راج لگا تو خیبرپختونخوا کا ہر چوک ڈی چوک ہوگا، محمود خان اچکزئی

تحریک تحفظِ آئین پاکستان نے ملک میں بڑھتے سیاسی تناؤ کے پیش نظر قومی کانفرنس بلانے کا مطالبہ کر دیا ہے۔ پشاور میں تحریک انصاف کے زیرِ اہتمام جلسے سے خطاب کرتے ہوئے سربراہ محمود خان اچکزئی نے کہا کہ اگر خیبرپختونخوا میں گورنر راج لگایا گیا تو صوبے کا ہر چوک ڈی چوک بن جائے گا۔

انہوں نے کہا کہ ملک میں حق و باطل کی جنگ کا آخری مرحلہ شروع ہو چکا ہے۔ “تحریک تحفظِ آئین پاکستان اور عمران خان وہ جمہوری قوتیں ہیں جن کی تحریک سے ان کے اوسان خطا ہو چکے ہیں۔” ان کا کہنا تھا کہ آئین توڑنے والا ہی اصل سیکیورٹی رسک ہے اور جنگی جنونیت کو ختم کرنا ہوگا، کیونکہ جن قوموں نے جنگ چھوڑی وہی ترقی کر رہی ہیں۔

اچکزئی نے مزید کہا کہ افغانستان والے ہمارے بھائی ہیں اور دونوں ممالک ایک زنجیر کی مانند ہیں۔ انہوں نے مطالبہ کیا کہ ججوں، جرنیلوں، علما اور سیاستدانوں پر مشتمل ایک قومی کانفرنس بلائی جائے جس میں سب ایک دوسرے کو معاف کر کے ملک کو آگے بڑھانے کا فیصلہ کریں۔ “ہمیں ایسا پاکستان چاہیے جہاں آئین و قانون کی بالادستی ہو اور عوام کی منتخب اسمبلیاں ریاست کی اصل نمائندہ ہوں۔”

جلسے سے علامہ ناصر عباس، سابق اسپیکر اسد قیصر، شاہد خٹک، مینا خان، تیمور سلیم جھگڑا، عاطف خان، مصطفی نواز کھوکھر، شیر علی ارباب اور معاونِ خصوصی شفیع جان نے بھی خطاب کیا۔