ایرانی وزیر داخلہ کا پاکستان مونومنٹ کا دورہ، یادگارِ شہداء پر حاضری

ایران کے وزیر داخلہ سکندر مومنی نے اپنے دورۂ پاکستان کے دوران اسلام آباد میں پاکستان مونومنٹ کا دورہ کیا، جہاں وزیر مملکت برائے داخلہ طلال چوہدری نے ان کا پرتپاک استقبال کیا۔ اس موقع پر فیڈرل کانسٹیبلری (FC) کے چاق و چوبند دستے نے معزز مہمان کو گارڈ آف آنر پیش کیا۔ ایرانی وزیر داخلہ نے یادگارِ شہداء پر پھولوں کی چادر چڑھائی، فاتحہ خوانی کی اور شہدائے پاکستان کی قربانیوں کو زبردست خراجِ عقیدت پیش کیا۔ دورے کے دوران انہیں پاکستان مونومنٹ کی تاریخی اہمیت پر بریفنگ دی گئی جبکہ انہوں نے شکر پڑیاں سے وفاقی دارالحکومت کے مناظر کا مشاہدہ بھی کیا۔ اس موقع پر آئی جی فیڈرل کانسٹیبلری ریاض نذیر گاڑا اور ڈی آئی جی اسلام آباد سمیت دیگر اعلیٰ حکام بھی موجود تھے۔