حوثیوں کی سعودیہ کو دھمکیاں قابل مذمت، تجارت کو نشانہ بنانا قومی سلامتی پر حملہ تصور ہوگا: پاکستان

پاکستان نے حوثی ملیشیا کی جانب سے سعودی عرب اور بحیرہ احمر میں تجارتی جہاز رانی کے خلاف جاری دھمکیوں پر شدید تشویش کا اظہار کرتے ہوئے سعودی عرب کی سلامتی، خودمختاری اور علاقائی سالمیت کے لیے اپنی غیر متزلزل حمایت کا اعادہ کیا ہے۔ ترجمان دفترِ خارجہ کے مطابق پاکستان نے سعودی عرب کے ساتھ تجارت کو نشانہ بنانے کو ناقابلِ قبول قرار دیتے ہوئے واضح کیا ہے کہ پاکستانی پرچم بردار جہازوں کے خلاف کسی بھی قسم کی جارحانہ کارروائی یا سمندری مفادات پر حملہ قومی سلامتی کے لیے خطرہ تصور کیا جائے گا۔ پاکستان نے تمام فریقین پر بین الاقوامی قوانین کے احترام اور کشیدگی کم کرنے کے لیے سفارت کاری پر زور دیا ہے، جبکہ حوثیوں کی اس ناکہ بندی کی دھمکی پر امریکی صدر ڈونلڈ ٹرمپ نے بھی امریکی جواب کا انتباہ جاری کر رکھا ہے۔