اسرائیلی انخلا کے بغیر حزب اللہ کو غیر مسلح کرنا ممکن نہیں، لبنانی صدر

لبنان کے صدر جوزف عون نے واضح کیا ہے کہ حزب اللہ کو غیر مسلح کرنا صرف اسی صورت میں ممکن ہے جب اسرائیل جنوبی لبنان سے اپنا کامل انخلا کرے، لبنانی فوج پورے ملک پر اپنی عملداری قائم کرے اور تعمیرِ نو کا تمام تر عمل صرف ریاست کی دیکھ بھال میں انجام دیا جائے۔

غیر ملکی میڈیا رپورٹس کے مطابق صدر جوزف عون نے یہ باتیں امریکا کے دارالحکومت واشنگٹن میں لبنان کی امریکا میں سفیر ندا حمادہ معوض کی جانب سے دی گئی ایک تقریب سے خطاب کرتے ہوئے کہیں۔ اس تقریب میں امریکی کانگریس کے ارکان، ٹرمپ انتظامیہ کے حکام اور دیگر اہم عالمی شخصیات شریک تھیں۔

لبنانی ایوانِ صدر کے جاری کردہ بیان کے مطابق صدر جوزف عون نے کہا کہ لبنان کا ماڈل نہ صرف خود لبنان بلکہ پورے خطے کے لیے اہم ہے کیونکہ یہ مختلف طبقات اور مذاہب کے درمیان بقائے باہمی اور ریاستی بنیادوں پر قائم ہے۔ انہوں نے زور دیا کہ اگر عالمی برادری واقعی حزب اللہ کے ہتھیاروں کا مسئلہ حل کرنا چاہتی ہے تو سب سے پہلے جنوبی لبنان سے اسرائیلی قبضہ ختم ہونا چاہیے، جس کے بعد لبنانی فوج کو ملک بھر میں کامل اختیار مل سکے اور تعمیرِ نو کا پروگرام محض ریاست انجام دے۔ صدر عون کے مطابق ان بنیادی اقدامات کے بغیر حزب اللہ کو غیر مسلح کرنے کی کوئی بھی کوشش عملی طور پر کامیاب نہیں ہو سکتی۔