آسکر ایوارڈ یافتہ اداکارہ برینڈا فریکر81 برس کی عمر میں چل بسیں

آسکر ایوارڈ یافتہ آئرلینڈ کی معروف اداکارہ برینڈا فریکر 81 برس کی عمر میں انتقال کر گئی ہیں۔ برینڈا فریکر نے 1990 میں فلم ’مائی لیفٹ فُٹ‘ میں شاندار اداکاری پر بہترین معاون اداکارہ کا اکیڈمی ایوارڈ (آسکر) جیت کر تاریخ رقم کی تھی اور وہ یہ اعزاز حاصل کرنے والی پہلی آئرش اداکارہ بنی تھیں۔ اس کے علاوہ وہ شہرہ آفاق فلم ’ہوم الون 2: لاسٹ ان نیو یارک‘ اور بی بی سی کے ڈرامے ’کیجولٹی‘ میں اپنی یادگار اداکاری کے لیے دنیا بھر میں مشہور تھیں۔ ڈبلن میں فروری 1945 میں پیدا ہونے والی برینڈا نے اپنے کیریئر کا آغاز 1970 کی دہائی میں تھیٹر اور ٹیلی ویژن سے کیا تھا۔ ان کے ایجنٹ فل بیل فیلڈ نے موت کی تصدیق کرتے ہوئے انہیں شاندار الفاظ میں خراجِ عقیدت پیش کیا اور کہا کہ برینڈا فریکر جیسی شخصیت اب دوبارہ کبھی دیکھنے کو نہیں ملے گی اور وہ مداحوں کے دلوں میں ہمیشہ زندہ رہیں گی۔