ڈراموں کے سکرپٹس اے آئی سے تیار کئے جا رہے ہیں: مہر بانو کا انکشاف

پاکستانی شوبز انڈسٹری کی معروف اداکارہ، ڈیجیٹل کری ایٹر اور ڈانسر مہر بانو نے انکشاف کیا ہے کہ اس وقت متعدد ٹی وی ڈراموں کے اسکرپٹس مصنوعی ذہانت (AI) کی مدد سے تیار کیے جا رہے ہیں، جس سے برسوں سے انڈسٹری کے لیے لکھنے والے پیشہ ور مصنفین کی محنت اور صلاحیتوں کی شدید بے توقیری ہو رہی ہے۔ ایک حالیہ گفتگو میں مہر بانو نے بتایا کہ وہ خود بھی ایسے ہی ایک پروجیکٹ کا حصہ رہ چکی ہیں اور اسی مایوس کن رویے کے باعث انہوں نے اب کام کرنا کم کر دیا ہے۔ اس کے علاوہ، اداکارہ نے ڈرامہ انڈسٹری میں خواتین کو درپیش سنگین مسائل پر بھی کھل کر آواز اٹھائی۔ ان کا کہنا تھا کہ “می ٹو” (#MeToo) تحریک کے باوجود خواتین کے لیے کام کی جگہ اب بھی مکمل طور پر محفوظ نہیں ہو سکی ہے۔ مہر بانو نے افسوس کا اظہار کرتے ہوئے کہا کہ انہوں نے خود سیٹ پر نوجوان لڑکیوں کے ساتھ انتہائی ناپسندیدہ اور ناقابلِ برداشت رویے دیکھے ہیں، اور وہ برسوں ایسے لوگوں کے ساتھ کام کرنے پر مجبور رہی ہیں جن کا رویہ انتہائی نامناسب تھا۔