عامر خان کی تیسری شادی پر انتہا پسند ہندوؤں آپے سے باہر، قتل پر 5 کروڑ روپے انعام کا اعلان

بالی ووڈ کے سدا بہار اور معروف اداکار عامر خان کو اپنی تیسری شادی کے بعد سے بھارت میں انتہا پسند ہندوؤں کی جانب سے شدید مخالفت اور جان لیوا دھمکیوں کا سامنا کرنا پڑ رہا ہے۔ بھارتی میڈیا کی رپورٹ کے مطابق، ایودھیا سے تعلق رکھنے والے انتہا پسند ہندو رہنما جگد گرو پرمھانس اچاریہ نے تمام حدیں پار کرتے ہوئے عامر خان کو قتل کرنے والے شخص کے لیے 5 کروڑ بھارتی روپے کے بھاری انعام کا اعلان کر دیا ہے۔ اس اشتعال انگیز اعلان کے بعد سوشل میڈیا پر شدید ردعمل سامنے آ رہا ہے اور سیکورٹی خدشات کا اظہار کیا جا رہا ہے، تاہم تاحال عامر خان یا ان کی ٹیم کی جانب سے اس سنگین معاملے پر کوئی باضابطہ بیان سامنے نہیں آیا۔ واضح رہے کہ دو روز قبل بھی بعض انتہا پسندوں نے عامر خان پر ہندو خاندانوں سے تعلق رکھنے والی خواتین سے مسلسل شادیاں کرنے کا بے بنیاد الزام عائد کرتے ہوئے ان کے خلاف شدید احتجاج کیا تھا اور مظاہروں کے دوران اداکار کا پتلا بھی نذرِ آتش کیا تھا۔