ایسے ڈرامے ہی آمدنی کا ذریعہ ہیں، حنا پرویز بٹ کی رجب بٹ کی والدہ پر تنقید

پاکستان مسلم لیگ (ن) کی رہنما اور رکنِ پنجاب اسمبلی حنا پرویز بٹ نے معروف سوشل میڈیا انفلوئنسر اور فیملی وی لاگر رجب بٹ کے بعد اب ان کی والدہ کو بھی شدید تنقید کا نشانہ بنایا ہے۔ سوشل میڈیا پر وائرل ہونے والے ایک وی لاگ کلپ میں رجب بٹ کی والدہ کو پرینک کے دوران بے ہوش ہونے کا ڈراما کرتے اور پھر مسکرا کر اٹھتے ہوئے دیکھا جا سکتا ہے، جس پر ردِعمل دیتے ہوئے حنا پرویز بٹ نے اپنے ‘ایکس’ اکاؤنٹ پر لکھا کہ ایسے ہی ڈراموں کے ذریعے یہ لوگ مالی فائدہ حاصل کرتے ہیں۔ انہوں نے تشویش کا اظہار کیا کہ آٹھ، آٹھ سال کے معصوم بچے ایسا مواد دیکھ کر متاثر ہو رہے ہیں اور اس خاندان نے معاشرے کی بہتری کے لیے کبھی کوئی مثبت کردار ادا نہیں کیا۔ حنا پرویز بٹ کے اس سخت موقف پر سوشل میڈیا صارفین میں ملا جلا ردِعمل سامنے آیا ہے؛ جہاں بعض صارفین نے ایسے مواد کے بائیکاٹ اور چینلز پر پابندی کا مطالبہ کیا ہے، وہیں کچھ صارفین نے رجب بٹ کا دفاع کرتے ہوئے اسے محض عام تفریح قرار دیا ہے۔ واضح رہے کہ حنا پرویز بٹ اس سے قبل بھی رجب بٹ کے کانٹینٹ کو بچوں کی تربیت کے لیے نقصان دہ قرار دے چکی ہیں۔