بعض لوگ بامقصد کام کی بجائے دوسروں پر تنقید سے شہرت حاصل کر رہے ہیں: محمد احمد

پاکستان کے سینئر اداکار و مصنف محمد احمد نے آن لائن تنقید اور تنازعات پر مبنی مواد کے بڑھتے ہوئے رجحان پر گہری تشویش کا اظہار کرتے ہوئے کہا ہے کہ آج کل بہت سے لوگ بامقصد کام کرنے کے بجائے دوسروں پر تنقید کر کے سستی شہرت حاصل کر رہے ہیں۔ سوشل میڈیا ایپ انسٹاگرام پر شیئر کی گئی ایک ویڈیو میں انہوں نے طنزیہ انداز اختیار کرتے ہوئے کہا کہ صارفین کی نظر میں اب اداکاری اور لکھنا کوئی مشکل پیشہ نہیں رہا، بلکہ توجہ، لائکس اور فالوورز حاصل کرنے کا سب سے آسان طریقہ دوسروں کے خلاف باتیں کرنا اور تنازع کھڑا کرنا بن چکا ہے۔ کسی کا نام لیے بغیر ان کا کہنا تھا کہ جب بعض افراد اپنے شعبے میں کامیابی حاصل نہیں کر پاتے تو وہ اس منفی راستے کو اپناتے ہیں، جبکہ یوٹیوب اور ٹک ٹاک جیسے پلیٹ فارمز پر روسٹنگ اور ذاتی تنقید کو تخلیقی کام کے مقابلے میں زیادہ پذیرائی ملتی ہے۔ انہوں نے واشگاف الفاظ میں کہا کہ حقیقی صلاحیت برسوں کی محنت اور مسلسل جدوجہد کا نتیجہ ہوتی ہے مگر موجودہ دور میں سنسنی خیز مواد کو زیادہ اہمیت دی جا رہی ہے۔ اگرچہ محمد احمد نے کسی کا نام نہیں لیا، تاہم ان کے اس بیان نے سوشل میڈیا پر ایک نئی بحث چھیڑ دی ہے اور شوبز انڈسٹری کی کئی معروف شخصیات نے ان کے اس مؤقف کی بھرپور حمایت کی ہے۔