سوشل میڈیا انفلوئنسرز کو فالو کرکے بچے تربیت کا ستیاناس کررہے ہیں، حنا پرویز بٹ

پاکستان مسلم لیگ (ن) کی سینئر رہنما اور معروف سماجی شخصیت حنا پرویز بٹ نے پاکستان کے چند نامور اور متنازع سوشل میڈیا انفلوئنسرز اور یوٹیوبرز کو سخت تنقید کا نشانہ بناتے ہوئے انہیں ‘جاہل’ قرار دے دیا ہے۔

سماجی رابطے کی ویب سائٹ ‘ایکس’ (سابقہ ٹویٹر) پر اپنے ایک آفیشل بیان میں ن لیگی رہنما حنا پرویز بٹ نے پاکستان کے مشہور یوٹیوبرز اور ٹک ٹاکرز رجب بٹ، علی حیدرآبادی اور سمیع رشید کی ایک مشترکہ تصویر شیئر کرتے ہوئے شدید برہمی کا اظہار کیا۔ انہوں نے اپنے پیغام میں لکھا: ”یہ ہمارے سوشل میڈیا انفلوئنسرز ہیں، ان جاہلوں کو ہماری عوام فالو کرتی ہے۔ جو بچے ان کو فالو کرتے ہیں، وہ اپنی تربیت کا ستیاناس کر رہے ہیں۔“ حنا پرویز بٹ نے پاکستانی والدین پر زور دیتے ہوئے کہا کہ اب والدین کو سنجیدگی سے سوچنا ہوگا اور اپنے بچوں کو ایسے غیر معیاری مواد بنانے والوں سے دور رکھنا ہوگا۔

واضح رہے کہ ن لیگی رہنما کی جانب سے یہ سخت ردعمل ان یوٹیوبرز کی حالیہ متنازع سرگرمیوں کے بعد سامنے آیا ہے۔ گزشتہ روز ہی معروف یوٹیوبر اور ٹک ٹاکر علی حیدرآبادی نے انٹرنیٹ پر سستی شہرت اور ویوز (Views) حاصل کرنے کے لیے اپنی اہلیہ کو طلاق دینے کی باقاعدہ ویڈیو شیئر کی تھی، جس پر انہیں سوشل میڈیا صارفین اور شائقین کی جانب سے شدید عوامی ردعمل اور تنقید کا سامنا کرنا پڑ رہا ہے۔ بعد ازاں، علی حیدرآبادی کی اہلیہ نے بھی سامنے آکر ان پر انتہائی سنگین نوعیت کے الزامات عائد کیے تھے۔