ٹیلر سوِفٹ اور ٹریوس کیلس کی شادی آج میڈیسن اسکوائر گارڈن میں ہوگی، سکیورٹی حکام نے تصدیق کر دی

سکیورٹی پلانز سے وابستہ ایک اعلیٰ قانون نافذ کرنے والے اہلکار نے تصدیق کی ہے کہ عالمی شہرت یافتہ پاپ اسٹار ٹیلر سوِفٹ اور این ایف ایل (NFL) اسٹار ٹریوس کیلس کی شادی آج (جمعہ کی رات) نیویارک کے تاریخی کنسرٹ اور اسپورٹس ایرینا ‘میڈیسن اسکوائر گارڈن’ (MSG) میں منعقد ہو رہی ہے۔

امریکی خبر رساں ادارے ‘ایسوسی ایٹڈ پریس’ (AP) کے مطابق، نام ظاہر نہ کرنے کی شرط پر اہلکار نے بتایا کہ شادی کی تقریبات کا آغاز جمعرات کی رات ایک نجی ریہرسل ڈنر (Pre-party) سے ہوا، جس میں تقریباً 100 قریبی مہمانوں نے شرکت کی۔ سرکاری اجازت نامے کے مطابق، شادی کی مرکزی تقریب جمعہ کی شام 5 بجے شروع ہوگی جو اگلے روز علی الصبح 4 بجے تک جاری رہ سکتی ہے۔

نیویارک سٹی کے میئر زہران ممدانی نے بھی تصدیق کی ہے کہ میڈیسن اسکوائر گارڈن میں ایک بڑے ایونٹ کے لیے اجازت نامہ حاصل کر لیا گیا ہے اور انتظامیہ اس کے لیے پوری طرح تیار ہے۔ تقریب کی سکیورٹی اور رازداری کو یقینی بنانے کے لیے مین ہٹن ایرینا کے گردونواح میں سڑکوں کو عارضی طور پر بند کر دیا گیا ہے اور خصوصی داخلی ٹینٹ نصب کیے گئے ہیں۔ نیویارک پولیس کمشنر جیسیکا ٹش کا کہنا ہے کہ پولیس نے سکیورٹی کے فول پروف انتظامات کیے ہیں۔

واضح رہے کہ گزشتہ کئی ہفتوں سے اس ہائی پروفائل جوڑے کی ‘چار جولائی’ (امریکی یومِ آزادی) کے ویک اینڈ پر شادی کی افواہیں گرم تھیں، جن کی اب سرکاری ذرائع سے تصدیق ہو چکی ہے، تاہم جوڑے کے نمائندوں نے اب تک اس پر باضابطہ عوامی بیان جاری نہیں کیا ہے۔