نتھیا گلی کی سیر کو جانیوالی اداکارہ جگن کاظم کس بات پر برہم ہوئیں؟ ویڈیو وائرل

پاکستان کی معروف اداکارہ اور ٹی وی ہوسٹ جگن کاظم ایبٹ آباد کے مشہور و خوبصورت سیاحتی مقام نتھیا گلی کی سیر کے دوران جگہ جگہ کچرا اور گندگی دیکھ کر سیاحوں اور مقامی انتظامیہ پر شدید برہم ہو گئیں۔

سوشل میڈیا پر اداکارہ کی ایک ویڈیو تیزی سے وائرل ہو رہی ہے، جس میں وہ نتھیا گلی کے دلفریب مناظر کے درمیان پھیلی گندگی کی نشان دہی کرتے ہوئے اپنے غصے کا اظہار کر رہی ہیں۔ ویڈیو میں جگن کاظم کا کہنا تھا کہ میں اتنی خوبصورت جگہ نتھیا گلی آئی ہوں، لیکن یہاں کا حال دیکھ کر افسوس ہو رہا ہے۔ آپ جس جگہ بھی جائیں، وہاں کچرے کے ڈھیر لگے ہوئے ہیں۔ لوگوں نے جگہ جگہ پلاسٹک کے بیگز اور ریپرز پھینکے ہوئے ہیں، کیا وہ اسے اٹھا کر کسی کوڑے دان (Dustbin) میں نہیں پھینک سکتے تھے؟ اداکارہ نے ملکی حالات کا رونا رونے والے شہریوں کو آڑے ہاتھوں لیتے ہوئے کہا کہ ہم ہمیشہ یہ شکایت کرتے نظر آتے ہیں کہ ‘ملک کا کیا ہوگا؟’، ‘ملک کے حالات کیسے ٹھیک ہوں گے؟’۔ لیکن حقیقت یہ ہے کہ ہم خود صفائی کا خیال نہیں رکھتے اور پھر موسمیاتی تبدیلیوں (Climate Change) کا رونا روتے ہیں۔

جگن کاظم نے ماحول پر بات کرتے ہوئے مزید کہا کہ دنیا بھر میں جو موسمی سختیاں اور خراب حالات دیکھنے کو مل رہے ہیں، اس کی بنیادی وجہ یہی ہے کہ اللہ تعالیٰ نے ہمیں اتنی خوبصورت دنیا اور فطرت سے نوازا ہے لیکن ہم اس کا خیال بالکل نہیں رکھ رہے۔ جب ہم خود ماحول کو گندا کریں گے اور موسمی حالات خراب ہوں گے، تو یہ کسی اور کی نہیں بلکہ خالصتاً ہماری اپنی غلطی ہے۔ سوشل میڈیا صارفین کی جانب سے اداکارہ کے اس بیانیے کو خوب سراہا جا رہا ہے اور لوگ سیاحتی مقامات پر صفائی برقرار رکھنے کے لیے سخت قوانین اور جرمانوں کا مطالبہ کر رہے ہیں۔