برطانیہ کا مزید 45 ہزار غیر قانونی مقیم افراد کو ملک بدر کرنے کا اعلان

برطانیہ نے ملک میں غیر قانونی طور پر مقیم افراد اور غیر ملکی مجرموں کے خلاف کریک ڈاؤن کو مزید سخت کرتے ہوئے آئندہ 10 برسوں کے دوران 45 ہزار سے زائد افراد کو ملک بدر کرنے کا بڑا اعلان کر دیا ہے۔

خبر ایجنسی کے مطابق، برطانوی حکومت کے اس نئے اور جامع منصوبے کے تحت ملک بدری (Deportation) کے عمل کو تیز اور مؤثر بنانے کے لیے امیگریشن ریموول سینٹرز (Immigration Removal Centres) کی گنجائش میں نمایاں اضافہ کیا جا رہا ہے۔ اس مقصد کے لیے حراستی مراکز میں فوری طور پر ایک ہزار نئے بستروں کا اضافہ کیا جائے گا تاکہ ملک بدری کے منتظر افراد کو کمیونٹی میں آزاد چھوڑنے کے بجائے محفوظ حراست میں رکھا جا سکے۔

برطانوی حکام کا کہنا ہے کہ اس نئی گنجائش کا بنیادی مقصد غیر ملکی سنگین مجرموں، ویزا کی خلاف ورزی کر کے غیر قانونی طور پر کام کرنے والے افراد اور چھوٹی کشتیوں کے ذریعے انگلش چینل عبور کر کے برطانیہ پہنچنے والے غیر قانونی تارکین وطن کو جلد از جلد حراست میں لینا ہے تاکہ ان کی بیدخلی کا عمل تیز کیا جا سکے۔

حکومت کی جانب سے جاری بیان میں واضح کیا گیا ہے کہ اس سخت اقدام کا مقصد برطانوی امیگریشن نظام کو مؤثر بنانا، سرحدی سلامتی کو مزید مضبوط کرنا اور عوامی تحفظ کو ہر صورت یقینی بنانا ہے۔ حکام نے اعادہ کیا کہ غیر قانونی امیگریشن کی روک تھام اور ملک بدری کے نظام کو مزید سخت بنانے کے لیے آئندہ بھی ایسے عملی اور سخت اقدامات جاری رکھے جائیں گے۔