ملائیشیا کے وزیر داخلہ 2 روزہ دورے پر پاکستان پہنچ گئے

اسلام آباد: وفاقی وزیرِ داخلہ محسن نقوی کی خصوصی دعوت پر ملائیشیا کے وزیرِ داخلہ سیف الدین ناسیتیون بن اسماعیل دو روزہ باضابطہ دورے پر پاکستان پہنچ گئے ہیں۔

اسلام آباد انٹرنیشنل ایئرپورٹ پہنچنے پر وزیرِ مملکت برائے داخلہ طلال چوہدری نے ملائیشیا کے وزیرِ داخلہ کا گرمجوش استقبال کیا۔ اس موقع پر چیف کمشنر اسلام آباد اور آئی جی اسلام آباد پولیس بھی معزز مہمان کے استقبال کے لیے ایئرپورٹ پر موجود تھے۔

اپنے دو روزہ قیام کے دوران ملائیشیا کے وزیرِ داخلہ پاکستان کی اعلیٰ سیاسی و حکومتی قیادت اور اپنے ہم منصب وفاقی وزیرِ داخلہ محسن نقوی سے اہم اور تفصیلی ملاقاتیں کریں گے۔ ان نشستوں کے دوران پاک-ملائیشیا دوطرفہ تعلقات، امن و امان کے شعبے میں باہمی تعاون، سیکورٹی امور اور مشترکہ مفادات کے مختلف شعبوں میں روابط مزید مضبوط بنانے پر تبادلہ خیال کیا جائے گا۔

ترجمان کے مطابق ملاقاتوں میں دونوں برادر اسلامی ممالک کے درمیان قانونی اور انتظامی تعاون کو مزید وسعت دینے کے امکانات کا جائزہ لیا جائے گا۔ دو روزہ دورہ مکمل کرنے کے بعد ملائیشیا کے وزیرِ داخلہ اپنے وفد کے ہمراہ واپس روانہ ہوں گے۔