وفاقی کابینہ کا اجلاس طلب، امن و امان، قانون سازی، بانی کے معاملے پر غور ہوگا

اسلام آباد: وزیراعظم محمد شہباز شریف کی زیرِ صدارت وفاقی کابینہ کا اہم اور اضطراری اجلاس آج طلب کر لیا گیا ہے، جس میں ملک کی مجموعی امن و امان، معاشی اور سیاسی صورتحال کا تفصیلی جائزہ لیا جائے گا۔

ذرائع کے مطابق اجلاس کے دوران کابینہ اہم ممکنہ قانون سازی سے متعلق مختلف تجویز کردہ مسودات کا جائزہ لے گی۔ اس کے علاوہ، پاکستان تحریکِ انصاف (پی ٹی آئی) کے بانی سے متعلق سپریم کورٹ کے حالیہ فیصلے اور حکومت کی جانب سے دائر کی جانے والی نظرِ ثانی کی اپیل پر بھی تفصیلی غور و خوص کیا جائے گا۔

اجلاس میں وفاقی وزیر برائے قانون و انصاف کابینہ ارکان کو سپریم کورٹ کے فیصلے، اس کے قانونی اثرات اور حکومتی اپیل سے متعلق تفصیلی بریفنگ دیں گے تاکہ آئندہ کی قانونی حکمتِ عملی طے کی جا سکے۔

ذرائع نے مزید بتایا کہ کابینہ کے اجلاس میں بھارت میں تعینات امریکی سفیر کے مقبوضہ جموں و کشمیر کے متنازع دورے اور اس سے متعلق دیے گئے غیر ذمہ دارانہ بیان کی مذمتی قرارداد بھی منظور کیے جانے کا امکان ہے، جس کے ذریعے پاکستان اپنے واضح سفارتی موقف اور تحفظات کا اعادہ کرے گا۔