اسرائیلی فوج کی لبنان میں موجودگی کو توسیع دینے پر لبنانی شہریوں کا شدید احتجاج

لبنان اور اسرائیل کے درمیان ہونے والے حالیہ معاہدے میں لبنانی سرزمین پر اسرائیلی فوج کی موجودگی کو توسیع دینے کے فیصلے پر لبنانی عوام کا غصہ سڑکوں پر آ گیا ہے۔ دارالحکومت بیروت سمیت ملک کے کئی بڑے شہروں میں شہریوں نے سڑکوں پر نکل کر شدید احتجاج کیا، ٹائر جلائے اور حکومت کے خلاف سخت نعرے بازی کی۔

یہ متنازع مذاکرات امریکہ کی سرپرستی میں ہوئے، جس میں طے پایا ہے کہ اسرائیل تب تک جنوبی لبنان میں اپنی فوج برقرار رکھ سکے گا جب تک وہ خود یہ سمجھے گا کہ اس کے شہریوں کو سیکیورٹی خطرات لاحق ہیں۔ امریکی وزیر خارجہ مارکو روبیو کے مطابق، اس فریم ورک معاہدے کے تحت درج ذیل اہم فیصلے کیے گئے ہیں ۔ معاہدے میں حزب اللہ کو مکمل طور پر غیر مسلح کرنے اور اس کے عسکری بنیادی ڈھانچے (انفراسٹرکچر) کے خاتمے پر اتفاق کیا گیا ہے۔ معاہدے کے تحت سیکیورٹی اور فوجی معاملات کی نگرانی کے لیے ایک سہ فریقی فوجی رابطہ گروپ قائم کیا جائے گا۔

لبنانی صدر جوزف عون  نے عوام کو یقین دہانی کرواتے ہوئے کہا کہ یہ معاہدہ اس بات کو یقینی بنائے گا کہ اسرائیلی افواج بالآخر لبنان کی سرزمین سے باہر نکل جائیں۔حزب اللہ نے اس معاہدے کو یکسر مسترد کرتے ہوئے کہا کہ یہ لبنان اسرائیل معاہدہ دراصل “امریکہ ایران اسلام آباد مفاہمتی یادداشت” کو سبوتاژ کرنے کی ایک سوچی سمجھی کوشش ہے۔ اس معاہدے  کے بعد پھوٹنے والے عوامی احتجاج نے لبنان کی سیاسی اور سیکیورٹی صورتحال کو انتہائی سنگین بنا دیا ہے۔