سابق ٹینس چیمپئن کرس ایورٹ پر کینسر کا تیسری بار حملہ

سابق عالمی نمبر ون اور 18 گرینڈ سلم ٹائٹلز کی فاتح امریکی ٹینس اسٹار کرس ایورٹ نے انکشاف کیا ہے کہ کینسر کی مہلک اور بے رحم بیماری تیسری مرتبہ ان کی زندگی میں واپس آ گئی ہے۔واضح رہے کہ 71 سالہ امریکی سابق ٹینس پلیئر کو پہلی مرتبہ دسمبر 2021 میں رحم کے کینسر (اووری کینسر) کی تشخیص ہوئی تھی، جس کے بعد علاج سے وہ صحت یاب ہو گئیں، تاہم سال 2023 کے آخر میں یہ بیماری دوبارہ لوٹ آئی تھی۔ اب ایک بار پھر اس جان لیوا مرض نے انہیں اپنی لپیٹ میں لے لیا ہے۔

کرس ایورٹ نے اپنی صحت سے متعلق مداحوں کو آگاہ کرتے ہوئے کہا، “میں نے ہمیشہ اپنی صحت کے حوالے سے ہر بات کھل کر شیئر کی ہے۔ گزشتہ ہفتے میرے کئی طبی اسکینز ہوئے، جن کی رپورٹس سے یہ افسوسناک پتہ چلا ہے کہ کینسر ایک بار پھر واپس آ گیا ہے۔” انہوں نے بتایا کہ وہ اس سے قبل بھی سرجریز اور کیموتھراپی کے مراحل سے گزر چکی ہیں اور اب کینسر سے چھٹکارے کے لیے آنے والے ہفتوں میں دوبارہ کیموتھراپی کا عمل شروع کرائیں گی۔ سابق ٹینس اسٹار کا کہنا تھا کہ اگرچہ کینسر بے رحم ہے لیکن وہ اس کے خلاف جنگ لڑنے کے لیے پوری طرح پرامید اور پرعزم ہیں۔ کینسر کی تیسری بار تشخیص کے بعد کرس ایورٹ اس مرتبہ سال کے سب سے بڑے ٹینس ٹورنامنٹ “ومبلڈن” کے دوران بطور مبصر (کمنٹیٹر) اپنی پیشہ ورانہ ڈیوٹی انجام نہیں دے پائیں گی۔

یاد رہے کہ ٹینس کی تاریخ کی عظیم ترین کھلاڑیوں میں شمار ہونے والی کرس ایورٹ نے 1989 میں ٹینس سے ریٹائرمنٹ لے لی تھی، جس کے بعد سے وہ اسپورٹس براڈ کاسٹنگ کے شعبے سے وابستہ ہیں اور دنیا بھر میں ٹینس کمنٹری کا ایک بڑا نام ہیں۔