وفاقی حکومت کا کراچی حیدرآباد موٹر وے کی اازسرنو تعمیر کا فیصلہ

اسلام آباد: وفاقی حکومت نے آئندہ مالی سال کے وفاق پبلک سیکٹر ڈویلپمنٹ پروگرام (PSDP) کے تحت صوبہ سندھ کے بنیادی انفراسٹرکچر، ہائی ویز اور پینے کے پانی کے میگا پراجیکٹس کے لیے اربوں روپے کے ترقیاتی فنڈز مختص کرنے کی اہم تجاویز تیار کر لی ہیں۔ ان تجاویز میں سب سے کلیدی فیصلہ کراچی حیدرآباد موٹروے (M-9) کی جدید خطوط پر ازسرِنو تعمیر کا ہے۔

وفاقی بجٹ کی دستاویزات کے مطابق سندھ کے مختلف موٹرویز، ہائی ویز اور واٹر پراجیکٹس کے لیے درج ذیل فنڈز مختص کرنے کی تجاویز دی گئی ہیں:

وفاقی حکومت نے کراچی حیدرآباد موٹروے کی ازسرِنو تعمیر کا حتمی فیصلہ کیا ہے۔ یہ نئی اور جدید موٹروے پبلک پرائیویٹ پارٹنرشپ (PPP) کے تحت تعمیر کی جائے گی، جبکہ اس منصوبے کی کمرشل فزیبلٹی رپورٹ تیار کرنے کے لیے بجٹ میں 75 ملین روپے مختص کرنے کی تجویز ہے۔ سندھ کے اس دیرینہ اور سب سے اہم موٹروے منصوبے کی تعمیر کی رفتار تیز کرنے کے لیے وفاقی بجٹ میں 30 ارب روپے کی خطیر رقم مختص کرنے کی تجویز دی گئی ہے۔ساحلی پٹی کو تجارتی مراکز سے جوڑنے کے لیے کوسٹل ہائی وے اسکیم کے لیے بجٹ میں 25 ارب روپے مختص کرنے کی تجویز ہے۔ وفاقی ترقیاتی پروگرام (PSDP) میں سانگھڑ کو قومی شاہراہ (N-5) سے منسلک کرنے والے روڈ پراجیکٹ کے لیے 13 ارب روپے رکھنے کی تجویز ہے۔سندھ کے اس اہم ترین اندرونی روڈ لنک کی مکمل فنڈنگ آئندہ مالی سال کے بجٹ میں فراہم کر دی جائے گی تاکہ اس منصوبے کو بلا تاخیر مکمل کیا جا سکے۔

کراچی شہر میں پینے کے پانی کے سنگین بحران پر قابو پانے کے لیے وفاقی حکومت نے اپنے وعدے کے مطابق گریٹر کراچی واٹر سپلائی اسکیم (K-IV) کو بجٹ میں ترجیح دی ہے۔ اس میگا واٹر پراجیکٹ کی سول ورکس اور پائپ لائنز کی تکمیل کے لیے وفاقی بجٹ میں 10 ارب روپے مختص کرنے کی تجویز پیش کی گئی ہے۔

حکومتی ذرائع کے مطابق ان ہائی وے اور واٹر پراجیکٹس کی تکمیل سے نہ صرف سندھ میں لاجسٹکس اور نقل و حمل کا نظام جدید ہوگا بلکہ بین الصوبائی تجارت اور صنعتی روابط کو بھی بے پناہ فروغ ملے گا۔