قومی اقتصادی کونسل اجلاس میں ترقیاتی بجٹ کی منظوری، وزیراعظم کا وزرائے اعلیٰ سے اظہار تشکر

اسلام آباد: وزیراعظم محمد شہباز شریف کی زیر صدارت قومی اقتصادی کونسل کا اہم اجلاس منعقد ہوا جس میں آئندہ مالی سال کے قومی ترقیاتی بجٹ سمیت متعدد اہم فیصلوں کی منظوری دی گئی۔

اجلاس کے آغاز میں وزیراعظم نے مشکل معاشی حالات کے باوجود وفاقی حکومت کے ساتھ مثالی تعاون پر چاروں وزرائے اعلیٰ کا شکریہ ادا کیا اور کہا کہ وفاقی اکائیوں کے درمیان یکجہتی اور تعاون سے ہی ملک ترقی کی راہ پر گامزن ہو سکتا ہے۔

وزیراعظم نے ملکی معاشی استحکام کے لیے حکومتی معاشی ٹیم کی کارکردگی کو سراہا اور کہا کہ معاشی بہتری کے لیے جاری کوششیں تسلسل کے ساتھ جاری رہیں گی۔

اجلاس میں شرکاء نے خلیج میں حالیہ کشیدگی کے باوجود پاکستانی معیشت کو مستحکم رکھنے اور سفارتی سطح پر کشیدگی کم کرنے کی کوششوں کو سراہا۔

وزیراعظم نے کہا کہ بڑھتی ہوئی آبادی ملک کے لیے بڑا چیلنج ہے جبکہ صحت، تعلیم، روزگار اور نوجوانوں کی فنی تربیت حکومت کی ترجیحات میں شامل ہیں۔

اجلاس میں قومی اقتصادی کونسل کے چار نکاتی ایجنڈے کی اتفاق رائے سے منظوری دی گئی اور آئندہ مالی سال کے لیے ترقیاتی اہداف بھی طے کیے گئے۔

وزیراعظم نے ہدایت کی کہ وفاق اور صوبوں کے ترقیاتی منصوبوں میں مکمل ہم آہنگی پیدا کی جائے اور تمام منصوبے قومی ترجیحات کے مطابق ترتیب دیے جائیں۔

اجلاس میں مالی سال 2026 اور 2027 کے لیے ترقیاتی بجٹ کی منظوری بھی دی گئی جبکہ مجموعی قومی پیداوار کی شرح نمو کے اہداف بھی مقرر کیے گئے۔

وزیراعظم نے اجلاس کے تمام نکات پر اتفاق رائے سے منظوری پر شرکاء کا شکریہ ادا کرتے ہوئے کہا کہ یہی قومی یکجہتی ملک کے روشن مستقبل کی ضمانت ہے۔