آزادکشمیر عوامی ایکشن کمیٹی انتخابات رکوانا چاہتی ہے: رانا ثناء اللہ

اسلام آباد: وفاقی وزیر برائے سیاسی امور سینیٹر رانا ثناء اللہ نے سینیٹ میں اپوزیشن کے تحفظات کا جواب دیتے ہوئے کہا ہے کہ گلگت بلتستان کے انتخابات کے حوالے سے دھاندلی کا کوئی الزام سامنے نہیں آیا اور تمام سیاسی جماعتوں کو انتخابی مہم چلانے کے یکساں مواقع فراہم کیے گئے۔

انہوں نے کہا کہ پاکستان تحریک انصاف اور اس کے چیئرمین بیرسٹر گوہر نے بھرپور انتخابی مہم چلائی، لیکن کسی جماعت نے انتخابی نتائج یا انتخابی عمل پر باضابطہ اعتراض نہیں کیا۔

رانا ثناء اللہ کے مطابق عوامی ایکشن کمیٹی کے بیشتر مطالبات تسلیم کیے جا چکے ہیں اور ان پر تحریری معاہدہ بھی موجود ہے۔ انہوں نے کہا کہ مہاجرین کی نشستوں سے متعلق بھی متعدد مطالبات منظور کیے گئے۔

وفاقی وزیر نے دعویٰ کیا کہ بعض حلقے انتخابات کے انعقاد کو روکنا چاہتے تھے، کیونکہ انتخابات کے انعقاد کے بعد ان کے مؤقف کی اہمیت ختم ہو جاتی۔

انہوں نے کہا کہ حکومت نے مذاکرات اور معاہدوں پر عملدرآمد کے بعد متعلقہ نمائندوں کو تفصیلی بریفنگ دی، تاہم بریفنگ کے دوران ان کا رویہ غیر مناسب تھا۔

رانا ثناء اللہ نے مزید کہا کہ پاکستان سے وفاداری کے حلف نامے کو بھی متنازع بنانے کی کوشش کی گئی، حالانکہ یہ آئینی اور قانونی تقاضا ہے۔

دریں اثنا اپوزیشن ارکان نے اپنی سابقہ واک آؤٹ کی کارروائی ختم کرتے ہوئے دوبارہ ایوان میں شرکت کی۔