ماضی کی مشہور بھارتی اداکارہ کا 30 سال بعد دوبارہ شوبز میں قدم رکھنے کا اعلان

اسی اور نوے کی دہائی میں اپنی جاندار اداکاری اور خوبصورتی سے کروڑوں دلوں پر راج کرنے والی بھارتی فلم انڈسٹری کی سینئر اداکارہ میناکشی شیشادری نے تین دہائیوں بعد مستقل طور پر بھارت واپسی اختیار کر لی ہے۔ انہوں نے طویل عرصے بعد شوبز انڈسٹری میں دوبارہ سرگرم ہونے اور فلمی دنیا میں واپسی کا باضابطہ اعلان کر دیا ہے۔

بھارتی میڈیا رپورٹس کے مطابق، فلم ‘دامنی’ اور ‘گھائل’ جیسی لازوال فلموں سے شہرت پانے والی میناکشی شیشادری حال ہی میں امریکا سے ممبئی منتقل ہوئی ہیں اور وہ ایک بار پھر بالی ووڈ میں بہترین اور جاندار کرداروں کی تلاش میں ہیں۔ اداکارہ نے سماجی رابطے کی ویب سائٹ انسٹاگرام پر ایک خصوصی ویڈیو پیغام کے ذریعے اپنی واپسی کا اعلان کرتے ہوئے مداحوں کی مسلسل محبت کا شکریہ ادا کیا۔

انسٹاگرام پر جاری کردہ اپنے پیغام میں میناکشی شیشادری کا کہنا تھا”میں پورے 30 سال بعد دوبارہ ممبئی میں موجود ہوں اور ایک نئی امید اور تروتازہ جذبے کے ساتھ انڈسٹری میں واپسی کر رہی ہوں۔ میں اب ایسے کردار ادا کرنا چاہتی ہوں جو کہانی میں ریڑھ کی ہڈی کی حیثیت رکھتے ہوں، خواہ وہ مرکزی ہوں یا معاون۔ یہاں تک کہ اگر کوئی مختصر کردار بھی ہو، لیکن اس کا اسکرین پر اثر ہونا ضروری ہے۔”

اداکارہ نے نئی ڈیجیٹل دنیا کے مطابق خود کو ڈھالنے کا اشارہ دیتے ہوئے بتایا کہ وہ روایتی سنیما (فلموں) کے ساتھ ساتھ او ٹی ٹی (OTT) پلیٹ فارمز پر بھی کام کرنے کے لیے مکمل تیار ہیں۔ تاہم، وہ صرف ایسے اسکرپٹس اور پروجیکٹس کا انتخاب کریں گی جو انہیں بطور فنکار کچھ نیا کرنے کا چیلنج فراہم کریں۔ انہوں نے انکشاف کیا کہ بھارت واپسی پر انہیں کئی فلموں کی پیشکشیں ہوئیں، مگر وہ اتنی متاثر کن نہیں تھیں کہ وہ ان کے لیے ہامی بھرتیں۔

اداکارہ نے اپنی گفتگو میں یہ واضح کیا کہ وہ کسی بھی پی آر یا ٹیلنٹ ایجنسی کے سہارے کے بغیر بالی ووڈ میں اپنے اس نئے سفر کو خود سنبھال رہی ہیں۔ انہوں نے بتایا کہ اب ان کی بنیادی رہائش بھارت میں ہی ہوگی، البتہ وہ اپنے خاندان کے ساتھ وقت گزارنے کے لیے کبھی کبھار امریکا کا دورہ بھی کرتی رہیں گی۔

میڈیا سے گفتگو کے آخر میں ان کا کہنا تھا کہ وہ اب زندگی کے اس مرحلے پر کسی کو کچھ ثابت کرنے نہیں آئیں، بلکہ صرف وہی کام کرنا چاہتی ہیں جو ان کے دل کو خوشی دے۔ انہوں نے اپنے پرانے اور نئے مداحوں سے اپیل کی کہ وہ اس نئے سفر میں بھی ان کا بھرپور ساتھ دیں، کیونکہ مداحوں کی محبت ہی ان کا اصل اثاثہ اور آگے بڑھنے کا حوصلہ ہے۔