رضوان کی کپتانی میں ٹیم بہتر نتائج نہ دے سکی، ہیڈ کوچ مائیک ہیسن

پاکستان کرکٹ ٹیم کے ہیڈ کوچ مائیک ہیسن نے کہا ہے کہ قومی ٹیم کے مفاد کو مدنظر رکھتے ہوئے فیصلے کیے جا رہے ہیں اور اسی سوچ کے تحت محمد رضوان کو ٹی ٹوئنٹی ٹیم سے باہر رکھا گیا۔

راولپنڈی میں میڈیا سے گفتگو کرتے ہوئے مائیک ہیسن نے کہا کہ ان کے تقرر سے پہلے ہی محمد رضوان مختصر فارمیٹ کی قومی ٹیم کا حصہ نہیں تھے جبکہ قیادت میں بھی تبدیلی آ چکی تھی۔

انہوں نے کہا کہ ویسٹ انڈیز کے خلاف ایک روزہ سیریز کے بعد ٹیم انتظامیہ اس نتیجے پر پہنچی کہ کپتانی میں تبدیلی کی ضرورت ہے کیونکہ ٹیم کی مجموعی کارکردگی توقعات کے مطابق نہیں تھی۔

ہیڈ کوچ کے مطابق ٹیم کا انتخاب صرف کسی ایک کھلاڑی کی کارکردگی کو دیکھ کر نہیں بلکہ پورے اسکواڈ کی ضرورت اور مستقبل کی حکمت عملی کے مطابق کیا جا رہا ہے۔

مائیک ہیسن نے کہا کہ اس فیصلے کے ذریعے دیگر کھلاڑیوں کو بھی یہ پیغام دیا گیا ہے کہ قومی ٹیم میں جگہ مستقل نہیں بلکہ کارکردگی سے مشروط ہے۔

انہوں نے مزید کہا کہ عالمی کپ قریب ہے اور ٹیم انتظامیہ مختلف آپشنز کو آزما کر مضبوط اور متوازن ٹیم تیار کرنا چاہتی ہے۔