امریکی صدر اور انکی انتظامیہ کو ایران کی پالیسی بارے شدید تنقید کا سامنا

امریکی صدر ڈونلڈ ٹرمپ اور ان کی موجودہ انتظامیہ کو ایران سے متعلق اسٹریٹجک پالیسی اور حالیہ دعوؤں پر بیرونی محاذ کے ساتھ ساتھ اب داخلی محاذ پر بھی شدید دباؤ کا سامنا کرنا پڑ گیا ہے۔ خود صدر ٹرمپ کی اپنی سیاسی جماعت، ریپبلکن پارٹی سے تعلق رکھنے والے بااثر سینیٹر تھام ٹلس (Thom Tillis) نے انتظامیہ کی ایران پالیسی کو کھلے عام تنقید کا نشانہ بناتے ہوئے کئی سنجیدہ سوالات اٹھا دیے ہیں۔امریکی نشریاتی ادارے کو دیے گئے اپنے ایک خصوصی انٹرویو میں ریپبلکن سینیٹر تھام ٹلس نے صدر ٹرمپ کی سیکیورٹی ٹیم کو کٹہرے میں کھڑا کیا۔ انہوں نے براہِ راست سوال اٹھایا

”امریکی وزیر دفاع پیٹ ہیگستھ (Pete Hegseth) اور دیگر اعلیٰ حکام نے تقریباً تین ماہ قبل یہ باقاعدہ اور بڑا دعویٰ کیوں کیا تھا کہ ہم نے ایران کی (جوہری و عسکری) صلاحیتوں کو مکمل طور پر تباہ کر دیا ہے؟“

سینیٹر تھام ٹلس نے انتظامیہ کے تضادات پر گہری تشویش کا اظہار کرتے ہوئے مزید کہا کہ اگر تین ماہ قبل ایران کی صلاحیتیں ختم کر دی گئی تھیں، تو اب امریکی حکام کی جانب سے ایک بالکل مختلف راگ الاپا جا رہا ہے۔ ان کا کہنا تھا کہ اب ہم ایک ایسی نئی صورتحال پر بات کر رہے ہیں جہاں ممکنہ طور پر ایران کے پاس جوہری مواد اب بھی محفوظ اور موجود رہے گا۔ سینیٹر ٹلس نے حیرانی کا اظہار کرتے ہوئے پوچھا کہ ”یہ بدلتی صورتحال آخر کس طرح سے منطقی (Logical) قرار دی جا سکتی ہے؟“

انہوں نے وائٹ ہاؤس اور پینٹاگون کو واضح پیغام دیتے ہوئے اپنی گفتگو کا اختتام اس جملے پر کیا”امریکی عوام اور کانگریس کے سامنے بہت سی باتیں ایسی ہیں جن کی اب انتظامیہ کی جانب سے تفصیلی وضاحت ہونا شدید ضروری ہے۔“بین الاقوامی معاشی و تزویراتی ماہرین کے مطابق، ریپبلکن پارٹی کے اندر سے اٹھنے والی یہ اہم آواز اس بات کا ثبوت ہے کہ مشرقِ وسطیٰ اور ایران کے معاملے پر صدر ٹرمپ کی پالیسیوں کو خود ان کے اپنے خیمے میں بھی مکمل تائید حاصل نہیں ہے، اور آنے والے دنوں میں امریکی وزیر دفاع کو کانگریس کے سامنے سخت جوابدہی کا سامنا کرنا پڑ سکتا ہے۔