خواجہ محمد آصف نے فضل الرحمان کے بیان کو اخلاقی بے حسی قرار دیدیا

وفاقی وزیر دفاع خواجہ محمد آصف نے جمعیت علمائے اسلام (ف) کے سربراہ مولانا فضل الرحمان کے حالیہ متنازع بیان پر سخت برہمی کا اظہار کرتے ہوئے اسے ‘اخلاقی بے حسی’ قرار دیا ہے۔ سماجی رابطے کی ویب سائٹ پر جاری اپنے ایک بیان میں وزیر دفاع نے دوٹوک الفاظ میں کہا کہ پاک فوج کے جوانوں اور افسران کی لازوال قربانیوں کو محض نوکری یا تنخواہ سے جوڑنا کسی طور مناسب نہیں۔ انہوں نے واضح کیا کہ دنیا میں کوئی بھی شخص صرف چند ہزار روپے کی تنخواہ کے لیے اپنی سب سے قیمتی چیز یعنی جان قربان نہیں کرتا، بلکہ یہ بے مثال قربانیاں ایک عظیم نظریے، اپنے ایمان اور وطنِ عزیز سے سچی وفاداری کے تحت دی جاتی ہیں۔

خواجہ محمد آصف نے اپنے بیان میں مزید کہا کہ ایسے وقت میں جب ہمارے جوان ملک کے دفاع کے لیے فرنٹ لائن پر لڑ رہے ہیں، شہداء کی عظیم قربانیوں پر سوال اٹھانا اور ان کا مذاق اڑانا انتہائی افسوسناک اور غیر مناسب رویہ ہے۔ انہوں نے زور دیا کہ شہداء کی قربانیوں کا تہہ دل سے احترام کرنا ہم سب پر بطور قوم فرض ہے اور یہ ہماری مشترکہ قومی ذمہ داری ہے۔ وزیر دفاع کے مطابق، شہداء کے اہلخانہ کے جذبات کو مجروح کرنے والے بیانات ملکی دفاعی قوتوں کے حوصلے پست کرنے کے مترادف ہیں جن کی جتنی بھی مذمت کی جائے وہ کم ہے