امریکا نے ایران کے لیے امن عمل کی 5 سخت شرائط مقرر کر دیں

مشرقِ وسطیٰ میں جاری شدید کشیدگی کو کم کرنے اور ممکنہ امن عمل کے آغاز کے تناظر میں ایک انتہائی اہم سفارتی پیش رفت سامنے آئی ہے۔ امریکی انتظامیہ نے ایران کے ساتھ باقاعدہ مذاکرات اور جنگ بندی کو آگے بڑھانے کے لیے تہران کے سامنے 5 انتہائی سخت اور غیر لچکدار شرائط عائد کر دی ہیں۔ایرانی خبر رساں ادارے ’فارس نیوز ایجنسی‘ کی رپورٹ کے مطابق، واشنگٹن نے تہران کو واضح پیغام بھیج دیا ہے کہ ان بنیادی شرائط کو پورا کیے بغیر دونوں ممالک کے درمیان کسی بھی قسم کے امن عمل یا جنگ بندی کے معاہدے کو آگے نہیں بڑھایا جا سکتا۔ امریکی انتظامیہ نے جنگ بندی کو بھی براہِ راست ان مذاکرات کی کامیابی سے مشروط کر دیا ہے۔ امریکا نے ایران کے اس دیرینہ اور بنیادی مطالبے کو یکسر مسترد کر دیا ہے جس میں ایرانی سرزمین پر امریکی و اتحادی بمباری سے ہونے والے بھاری مالی و جانی نقصانات کے ازالے کے لیے معاوضہ طلب کیا گیا تھا۔ واشنگٹن نے دوٹوک مؤقف اپنایا ہے کہ وہ کسی بھی قسم کی مالی ادائیگی نہیں کرے گا۔واشنگٹن نے مطالبہ کیا ہے کہ ایران اپنے پاس موجود 400 کلوگرام افزودہ یورینیم (Enriched Uranium) کو فوری طور پر ملک سے باہر منتقل کرے۔ ایران کو اپنی تمام جوہری تنصیبات بند کر کے خود کو صرف ایک جوہری تنصیب تک محدود کرنا ہوگا، یعنی ایران کو مستقبل میں صرف ایک ہی جوہری مرکز کو فعال رکھنے کی اجازت دی جائے گی۔

 تہران کی جانب سے اپنے تمام بین الاقوامی منجمد اثاثوں کو بحال کرنے کے مطالبے کے جواب میں، امریکا نے محض 25 فیصد اثاثوں تک نرمی پر آمادگی ظاہر کی ہے، جبکہ باقی اثاثے بدستور منجمد رہیں گے۔ امریکا نے مطالبہ کیا ہے کہ ایران لبنان سمیت خطے کے تمام دیگر محاذوں پر جاری کشیدگی اور پراکسیز کی حمایت فوری طور پر ختم کرنے کے لیے میز پر آئے۔

بین الاقوامی معاشی اور سیاسی ماہرین کا کہنا ہے کہ امریکا کی ان انتہائی سخت شرائط کے بعد اسلام آباد یا کسی بھی دوسرے مقام پر ہونے والے ممکنہ امن مذاکرات کے دوسرے دور کو شدید دھچکا پہنچ سکتا ہے، کیونکہ ایران کے لیے معاوضے کے بغیر اور اپنے جوہری پروگرام پر اتنی بڑی رعایت دینا بظاہر ناممکن نظر آتا ہے