پنکی کیس میں بڑے بڑے نام ہیں، کسی کی پگڑی نہیں اچھالیں گے: شرجیل میمن

کراچی: سندھ کے سینئر وزیر شرجیل انعام میمن نے کہا ہے کہ “پنکی کیس” میں بڑے بڑے نام سامنے آئے ہیں، تاہم وہ کسی کا نام نہیں لیں گے اور اس معاملے میں کسی کی پگڑی نہیں اچھالی جائے گی۔

انہوں نے کہا کہ حکومت منشیات کے نیٹ ورک کو مکمل طور پر ختم کرنے کے لیے سنجیدہ اقدامات کر رہی ہے اور اس نیٹ ورک کو نیست و نابود کرنا حکومت کی ذمہ داری ہے۔

شرجیل انعام میمن کے مطابق منشیات فروشی کے باعث قیمتی جانوں کا نقصان ہوا ہے، اس لیے اس ناسور کے خلاف سخت کارروائی جاری رہے گی۔

انہوں نے کہا کہ منشیات کے استعمال کے شکار افراد کو خود اس بات کو تسلیم کرنا چاہیے کہ وہ نشے کی لت میں مبتلا ہیں تاکہ ان کا مؤثر علاج ممکن بنایا جا سکے۔

سینئر وزیر نے مزید کہا کہ منشیات کے خاتمے کے لیے کام کرنے والے اداروں کی تعداد میں اضافہ ناگزیر ہے تاکہ اس مسئلے پر بہتر طور پر قابو پایا جا سکے۔