لاس اینجلس میں “میڈ اِن پاکستان” فٹبال ٹورنامنٹ کی تیاری

پاکستان قونصل خانہ لاس اینجلس اور پاکستان امریکن چیمبرز آف کامرس نے امریکا میں پاکستان کی کھیلوں کی صنعت متعارف کرانے کیلئے تعاون بڑھانے پر اتفاق کیا ہے۔

پاکستان عالمی سطح پر اعلیٰ معیار کی فٹبالز تیار کرنے کیلئے معروف ہے جبکہ سیالکوٹ دنیا بھر میں استعمال ہونے والی فٹبالز کی تیاری کا اہم مرکز سمجھا جاتا ہے۔ پاکستان نے فیفا ورلڈ کپ 2026 کی آفیشل فٹبال تیار کرکے ایک بار پھر عالمی سطح پر اپنی مہارت منوا لی ہے۔

قونصل خانے نے پاکستان امریکن چیمبرز آف کامرس کی اس کوشش کو سراہا ہے جس کے تحت امریکی مارکیٹ میں پاکستانی فٹبالز کی تشہیر کیلئے خصوصی تقریبات منعقد کی جا رہی ہیں۔

جون 2026 میں لاس اینجلس ریجن میں “میڈ اِن پاکستان” فٹبال ٹورنامنٹ منعقد کرنے کی منصوبہ بندی بھی جاری ہے، جس میں پاکستان میں تیار ہونے والی عالمی شہرت یافتہ فٹبالز کو نمایاں کیا جائے گا۔

تقریب کا مقصد پاکستانی صنعت، ہنرمندی اور عالمی معیار کو امریکی عوام اور کاروباری حلقوں کے سامنے اجاگر کرنا ہے۔