ساس ہمیشہ خود کو صحیح اور بہو کو نالائق سمجھتی ہیں، مریم نفیس

پاکستانی شوبز انڈسٹری کی مقبول اداکارہ مریم نفیس نے گھریلو ناچاقیوں اور ساس بہو کے روایتی جھگڑوں پر کھل کر بات کرتے ہوئے کہا ہے کہ معاشرے میں ساس کا یہ رویہ کہ وہ ہمیشہ خود کو صحیح اور بہو کو نالائق تصور کرتی ہیں، گھروں کی بربادی کا سبب بنتا ہے۔ ایک نجی ٹی وی کے مارننگ شو میں گفتگو کرتے ہوئے انہوں نے کہا کہ بہو پر سسرال کی خدمت کا بوجھ ڈالنا مناسب نہیں، بلکہ اسلامی تعلیمات کی روشنی میں بھی جوڑے کو اپنی علیحدہ زندگی گزارنے کا پورا حق حاصل ہے۔

مریم نفیس نے اپنی ذاتی زندگی کا حوالہ دیتے ہوئے ایک دلچسپ انکشاف کیا کہ اگرچہ ان کا بیٹا عیسیٰ ابھی ایک سال کا بھی نہیں ہوا، لیکن انہوں نے ابھی سے یہ ذہنی تیاری کر لی ہے کہ وہ بیٹے کی شادی کے بعد اسے علیحدہ گھر میں بسائیں گی۔ ان کا مزید کہنا تھا کہ اگر مالی حالات کی وجہ سے علیحدہ گھر ممکن نہ ہو، تب بھی گھر کے اندر بہو کو اتنی پرائیویسی اور آزادی ضرور ملنی چاہیے کہ وہ اپنا کچن الگ کر سکے۔ واضح رہے کہ مریم نفیس اور ان کے شوہر امان احمد حال ہی میں والدین بنے ہیں اور اداکارہ اپنے بے باک خیالات کی وجہ سے جانی جاتی ہیں۔