ایران نے یورینیم افزودگی عارضی طور پر روکنے پر آمادگی ظاہر کر دی: امریکی اخبار

امریکی اخبار وال سٹریٹ جنرل نے دعویٰ کیا ہے کہ ایران نے جنگ کے خاتمے کی تجاویز پر امریکہ کو بھیجے گئے جواب میں یورینیم افزودگی عارضی طور پر روکنے کی آمادگی ظاہر کی ہے، تاہم 20 سال تک افزودگی نہ کرنے اور جوہری تنصیبات ختم کرنے کا مطالبہ مسترد کر دیا ہے۔ اخبار کے مطابق ایران نے مرحلہ وار آبنائے ہرمز کھولنے اور پابندیاں ختم کرنے کی تجویز دی ہے۔ دوسری جانب ایرانی سرکاری ذرائع نے اس رپورٹ کو گمراہ کن قرار دیتے ہوئے کہا ہے کہ ایران نے تمام محاذوں پر فوری جنگ بندی، حملے نہ کرنے کی ضمانت اور تیل برآمدات سمیت تمام منجمد اثاثوں کی بحالی کا مطالبہ کیا ہے۔ ایرانی ذرائع کا اصرار ہے کہ جوہری مواد سے متعلق امریکی رپورٹ کے اہم نکات حقائق کے منافی ہیں۔