بجلی سبسڈی کا موجودہ نظام ختم؛ جنوری 2027 سے بی آئی ایس پی ڈیٹا کے ذریعے ٹارگٹڈ سبسڈی کا آغاز

وفاقی حکومت نے بجلی صارفین کیلئے سبسڈی نظام کا موجودہ طریقہ کار ختم کرنے کا فیصلہ کیا ہے۔

ذرائع وزارت خزانہ کے مطابق پاور سبسڈی کا موجودہ نظام ختم کر کے جنوری 2027 سے نیا ٹارگٹڈ سبسڈی نظام نافذ کرنے کی تیاری کی جا رہی ہے، نئے میکنزم کے تحت بے نظیرانکم سپورٹ پروگرام کے تحت بجلی سبسڈی ملے گی، صرف مستحق افراد کو سبسڈی کیلئے بی آئی ایس پی ڈیٹا کی بنیاد پر صارفین کی نشاندہی ہوگی۔
حکومت اور آئی ایم ایف کے درمیان سبسڈی میکنزم کو تبدیل کرنے پر معاہدہ طے پا گیا، پاور سیکٹر میں سبسڈی سے متعلق اصلاحات پر آئی ایم ایف کو تحریری یقین دہانی کرائی گئی ہے، نئے میکنزم میں تبدیلی سے ٹیرف ڈیفرینشل اور کراس سبسڈی نظام ختم کر دیا جائے گا۔
ذرائع کے مطابق اقدام سے کم یونٹس ظاہر کرنے کیلئے متعدد میٹرز کے استعمال کا راستہ روکا جائے گا، بجلی صارفین کو نیشنل سوشیو اکنامک رجسٹری سے منسلک کرنے پر کام کا آغاز ہوگا، عالمی بینک کے تعاون سے مستحق صارفین کی تصدیق کا نیا نظام متعارف کرایا جائے گا، پاور سبسڈی ادائیگی کیلئے بیرونی فرم کی خدمات رواں ماہ حاصل کرنے کا فیصلہ کیا گیا ہے۔
ذرائع کا کہنا ہے کہ اصلاحات کے تحت حکومت آبپاشی نظام میں بھی تبدیلی کیلئے اقدامات کرے گی، آبپاشی نظام میں اصلاحات کیلئے ای۔ آبیانہ سسٹم ملک بھر میں نافذ کیا جائے گا۔
وزارت خزانہ کے ذرائع کے مطابق سندھ، خیبرپختونخوا اور بلوچستان میں بھی ڈیجیٹل ای۔آبیانہ نظام نافذ کیا جائے گا، پنجاب میں ای بیانیہ نظام پہلے سے لاگو، باقی صوبوں میں اب نافذ ہوگا۔