پاکستان میں اپریل کے دوران تجارتی خسارہ 43 فیصد سے زائد بڑھ گیا

ملک میں تجارتی خسارے اور درآمدات میں نمایاں اضافہ ریکارڈ کیا گیا ہے، وفاقی ادارہ شماریات کی جاری کردہ رپورٹ کے مطابق اپریل کے دوران معاشی دباؤ میں اضافہ دیکھنے میں آیا۔

رپورٹ کے مطابق اپریل میں ماہانہ بنیادوں پر تجارتی خسارہ 43 اعشاریہ 50 فیصد بڑھ گیا جبکہ درآمدات میں 28 اعشاریہ 41 فیصد اضافہ ریکارڈ کیا گیا۔ اس کے برعکس برآمدات میں بھی 9 اعشاریہ 50 فیصد اضافہ ہوا، تاہم یہ اضافہ تجارتی خسارے کو کم کرنے کے لیے ناکافی ثابت ہوا۔

اعداد و شمار کے مطابق اپریل میں درآمدات کا حجم 6 ارب 55 کروڑ 30 لاکھ ڈالرز رہا جبکہ برآمدات 2 ارب 47 کروڑ 90 لاکھ ڈالرز تک محدود رہیں، جس کے باعث تجارتی خسارہ 4 ارب 7 کروڑ ڈالرز سے تجاوز کر گیا۔

سالانہ بنیادوں پر بھی تجارتی خسارے میں 3 اعشاریہ 83 فیصد اضافہ دیکھا گیا، جبکہ درآمدات میں 7 اعشاریہ 46 فیصد اور برآمدات میں 14 اعشاریہ 03 فیصد اضافہ ریکارڈ کیا گیا۔

رپورٹ کے مطابق رواں مالی سال کے پہلے 10 ماہ کے دوران تجارتی خسارہ 20 اعشاریہ 80 فیصد بڑھ کر 31 ارب 99 کروڑ ڈالرز تک پہنچ گیا، جو معیشت کے لیے تشویش کا باعث قرار دیا جا رہا ہے۔