خیبرپختونخوا میں برفانی جھیلوں کے پھٹنے کا خدشہ، ہائی الرٹ جاری

پشاور: پی ڈی ایم اے خیبر پختونخوا نے صوبے کے بالائی علاقوں میں موسمیاتی خطرات کے پیشِ نظر ہائی الرٹ جاری کر دیا ہے۔ محکمہ موسمیات کے مطابق درجہ حرارت میں اچانک اضافے اور 3 مئی سے متوقع بارشوں کے نئے سلسلے کے باعث چترال، دیر، سوات اور کوہستان میں گلیشیئر جھیلوں کے پھٹنے اور فلیش فلڈ (اچانک سیلاب) کا شدید خطرہ پیدا ہو گیا ہے۔ الرٹ میں خبردار کیا گیا ہے کہ ندی نالوں میں طغیانی سے نشیبی علاقوں کو نقصان پہنچ سکتا ہے۔ پی ڈی ایم اے نے ضلعی انتظامیہ کو ہنگامی اقدامات کرنے اور ریسکیو اداروں کو مشینری کے ساتھ تیار رہنے کی ہدایت کی ہے، جبکہ عوام سے غیر ضروری سفر سے گریز کی اپیل کی گئی ہے۔