علی ظفر اور میشا شفیع ایک بار پھر آمنے سامنے، عدالت میں اپیل دائر

گلوکارہ میشا شفیع نے سیشن کورٹ کے اس فیصلے کو لاہور ہائیکورٹ میں چیلنج کر دیا ہے جس کے تحت انہیں علی ظفر کو 50 لاکھ روپے ہرجانہ ادا کرنے کا حکم دیا گیا تھا۔ میشا شفیع کے وکیل ثاقب جیلانی کی جانب سے دائر اپیل میں موقف اختیار کیا گیا ہے کہ ٹرائل کورٹ نے حقائق کا درست جائزہ نہیں لیا۔ اپیل میں کہا گیا ہے کہ جنسی ہراسانی سے متعلق معاملہ ابھی سپریم کورٹ میں زیر التوا ہے، لہذا حتمی فیصلے سے قبل سیشن کورٹ کی ڈگری نافذ نہیں کی جا سکتی۔ میشا شفیع نے استدعا کی ہے کہ عدالت سیشن کورٹ کے فیصلے کو کالعدم قرار دے۔ یاد رہے کہ یہ تنازع پاکستان کی شوبز ہسٹری کے سب سے طویل اور ہائی پروفائل قانونی کیسز میں سے ایک بن چکا ہے۔