جاپان ایئر لائنز کا انقلابی اقدام؛ ہنیڈا ایئرپورٹ پر مسافروں کا سامان اب ہیومنائیڈ روبوٹس اٹھائیں گے

جاپان ایئر لائنز (JAL) اور جی ایم او (GMO) انٹرنیٹ گروپ نے ٹوکیو کے ہنیڈا ایئرپورٹ پر مسافروں کے سامان کی نقل و حمل کے لیے ہیومنائیڈ (انسانی مشابہت رکھنے والے) روبوٹس کے استعمال کا تجرباتی آغاز کرنے کا اعلان کیا ہے۔ مئی سے شروع ہونے والا یہ منصوبہ 2028 تک جاری رہے گا، جس کا مقصد گراؤنڈ ہینڈلنگ آپریشنز میں افرادی قوت کی کمی کو پورا کرنا اور مزدوری کے بوجھ کو کم کرنا ہے۔ جاپانی ایئرپورٹ کی تاریخ میں یہ اپنی نوعیت کی پہلی کوشش ہے، جس کے تحت فی الحال چینی ساختہ روبوٹس استعمال کیے جائیں گے جو مسلسل دو سے تین گھنٹے کام کرنے کی صلاحیت رکھتے ہیں۔ جے اے ایل گراؤنڈ سروس کے صدر یوشیتیرو سوزوکی کے مطابق، روبوٹس کا استعمال ملازمین پر جسمانی بوجھ کم کرنے میں مددگار ثابت ہوگا، جبکہ مستقبل میں ان کا دائرہ کار طیاروں کی صفائی تک بڑھانے کا ارادہ بھی ظاہر کیا گیا ہے۔