چین اور جاپان کے درمیان کشیدگی، چینی وزیر خارجہ کا سخت ردعمل

چین اور جاپان کے درمیان تائیوان کے معاملے پر جاری کشیدگی میں کمی نہ آ سکی۔ چینی وزیر خارجہ وانگ ای نے پہلی بار اس معاملے پر کھل کر بات کی اور کہا کہ جاپان نے تائیوان کے معاملے میں سرخ لکیر عبور کی ہے، جبکہ فوجی مداخلت کا بیان واضح طور پر جارحیت کے مترادف ہے۔ وانگ ای نے مزید کہا کہ چین نے اقوام متحدہ کے سیکریٹری جنرل کو خط لکھ کر آگاہ کیا ہے کہ ملک اپنے دفاع کے لیے ہر ممکن اقدام کرے گا۔ دوسری جانب، جاپانی وزیراعظم نے جی ٹونٹی اجلاس کے دوران کہا کہ ٹوکیو بیجنگ سے بات چیت کے لیے تیار ہے، تاہم انہوں نے تائیوان پر ممکنہ حملے کی صورت میں فوجی مداخلت کی دھمکی دی تھی۔ ماہرین کا کہنا ہے کہ تائیوان کے معاملے پر دونوں ممالک کے بیانات خطے میں کشیدگی بڑھا سکتے ہیں، اور عالمی سطح پر اس مسئلے پر تشویش پائی جا رہی ہے۔