اوم پوری نے میری بہن کو دھوکا دیا اور زندگی خراب کی: انو کپور کا الزام

بالی وڈ کے ورسٹائل اداکار انو کپور نے ایک حالیہ انٹرویو میں انجہانی اداکار اوم پوری پر اپنی بہن سیما کپور کو دھوکا دینے کا الزام عائد کرتے ہوئے کہا ہے کہ انہوں نے سیما کی زندگی برباد کر دی۔ بھارتی میڈیا کے مطابق، انو کپور نے اوم پوری کی اداکاری کی تعریف تو کی مگر ان کے ذاتی کردار پر کڑی تنقید کی۔

انو کپور کا کہنا تھا کہ “اوم پوری ایک عظیم اداکار تھے، لیکن بطور انسان انہوں نے ایک خاتون سے شادی کر کے اسے دھوکا دیا، اور میں اس خاتون کا بھائی ہوں”۔ انہوں نے انکشاف کیا کہ اوم پوری اپنی زندگی کے آخری برسوں میں جب شدید بیمار اور کمزور ہو گئے تھے، تو وہ سیما کپور کے پاس واپس آ گئے تھے، جنہوں نے ان کی دیکھ بھال کی۔ انو کپور نے بتایا کہ وہ اس وقت اپنی بہن پر ناراض بھی ہوئے تھے کہ انہوں نے ایسے شخص کو دوبارہ کیوں سہارا دیا۔

واضح رہے کہ اوم پوری اور سیما کپور کی شادی 1990 میں ہوئی تھی جو محض 8 ماہ بعد ہی ختم ہو گئی تھی، جس کے بعد اوم پوری نے صحافی نندیتا پوری سے شادی کر لی تھی۔ انو کپور نے مزید کہا کہ آج اوم پوری اس دنیا میں نہیں ہیں، لیکن انہیں اس بات کا افسوس ہے کہ ان کی بہن کی زندگی تباہ ہو گئی اور وہ بے سہارا رہ گئیں۔ انہوں نے یہ بھی واضح کیا کہ ان کی اوم پوری کے بیٹے یا سابقہ اہلیہ نندیتا سے کوئی ذاتی دشمنی نہیں ہے اور وہ ان کے لیے دعا گو ہیں۔ اوم پوری کا انتقال 2017 میں 66 برس کی عمر میں دل کا دورہ پڑنے سے ہوا تھا۔