گرین لائن کامن کوریڈور 31 اکتوبر 2026 تک کھول دیا جائے گا، میئر کراچی کا اعلان

میئر کراچی بیرسٹر مرتضیٰ وہاب نے اعلان کیا ہے کہ گرین لائن کا کامن کوریڈور 31 اکتوبر 2026 تک مکمل کر کے شہریوں کے لیے کھول دیا جائے گا۔ انہوں نے یہ اعلان کراچی میں پریس کانفرنس سے خطاب کرتے ہوئے کیا۔

مرتضیٰ وہاب نے کہا کہ گرین لائن منصوبے کی تعمیر کے باعث شہریوں کو شدید مشکلات کا سامنا کرنا پڑا، تاہم کام مکمل ہونے کے بعد یہ منصوبہ شہر کے ٹرانسپورٹ نظام میں نمایاں بہتری لائے گا اور عوام کو جدید سفری سہولت میسر ہوگی۔

میئر کراچی نے بتایا کہ گرین لائن منصوبہ شروع کرتے وقت کے ایم سی کو اعتماد میں نہیں لیا گیا تھا، جس کے نتیجے میں مختلف اداروں کے درمیان رابطے کے مسائل پیدا ہوئے۔ تاہم اب تمام حکومتی و بلدیاتی ادارے مشترکہ طور پر مسائل کو حل کرنے کے لیے سرگرم ہیں۔

انہوں نے مزید کہا کہ حکومت نے ریڈ لائن منصوبے کے تمام تکنیکی و انتظامی مسائل بھی حل کر دیے ہیں اور آئندہ چند روز میں اس منصوبے پر بھی باضابطہ تعمیراتی کام شروع کر دیا جائے گا۔

دوسری جانب، ایم کیو ایم کے رہنما امین الحق نے کہا کہ میئر کراچی نے سڑکوں کی خرابی اور ڈرینیج کے مسائل کے حوالے سے درست نشاندہی کی تھی، جس پر انہوں نے پی آئی ڈی سی ایل سے بات کی ہے اور مرتضیٰ وہاب کے تحفظات کو حقیقت پر مبنی قرار دیا۔