امریکا، اسرائیل کی ایران کو پسماندگی میں دھکیلنے کی کوشش ناکام ہوگئی: ایرانی سپریم لیڈر

ایران کے سپریم لیڈر آیت اللہ مجتبیٰ خامنہ ای نے ایک پرعزم اور سخت موقف پر مبنی بیان میں کہا ہے کہ امریکہ اور اسرائیل کی جانب سے ایران کو پسماندگی اور تنہائی کی طرف دھکیلنے کی تمام تر کوششیں ناکام ہو چکی ہیں، اور وہ وقت اب زیادہ دور نہیں جب بحیرہ عرب بھی دشمن کی موجودگی سے مکمل طور پر پاک ہو جائے گا۔ انہوں نے یہ بات ایران کے دفاعی ہفتے اور لبنانی تنظیم حزب اللہ کے شہید سربراہ سید حسن نصراللہ کی دوسری برسی کے موقع پر اپنے خصوصی پیغام میں کہی۔ سپریم لیڈر نے شہید حسن نصراللہ کو خراجِ تحسین پیش کرتے ہوئے انہیں ایک ‘ہیرو عرب کمانڈر’ اور عالمی مزاحمتی محاذ کی عظیم ترین علامت قرار دیا۔

ایرانی میڈیا کے مطابق اپنے خطاب میں آیت اللہ مجتبیٰ خامنہ ای نے کہا کہ بین الاقوامی سطح پر اب بعض تجزیہ کار اور ممالک ایران کو ‘چوتھی سپر پاور’ تسلیم کر رہے ہیں، لیکن اگر اللہ نے چاہا تو ایران دنیا کی سب سے بڑی طاقت بن کر ابھرے گا۔ ماضی کی صورتحال کا حوالہ دیتے ہوئے انہوں نے کہا کہ ایک وقت تھا جب دشمنوں نے جنوبی ایران کے دونوں جانب کے سمندری خطوں کو اپنی آزادانہ سرگرمیوں کا میدان بنایا ہوا تھا، لیکن آبنائے ہرمز کے جانباز محافظوں کی بدولت اب دشمن بحیرہ عرب سے آگے بڑھنے کی جرات نہیں رکھتا۔ انہوں نے واضح کیا کہ ایران کسی صورت اس پرانے اور کمزور دور میں واپس نہیں لوٹے گا جس کا خواب دشمن دیکھ رہا ہے۔