ایران میں 8 خواتین سزائے موت میری درخواست پر روک دی گئی، امریکی صدر

امریکی صدر ڈونلڈ ٹرمپ  نے دعویٰ کیا ہے کہ ایران میں سزائے موت کا سامنا کرنے والی 8 خواتین مظاہرین کی سزائیں روک دی گئی ہیں۔

سماجی رابطے کی اپنی ویب سائٹ پر جاری بیان میں امریکی صدر کا کہنا تھا کہ ان کی درخواست پر ایرانی حکام نے کارروائی کرتے ہوئے 8 میں سے 4 خواتین کو فوری طور پر رہا کر دیا ہے، جبکہ باقی 4 خواتین کو ایک ماہ قید کی سزا دی جائے گی۔

صدر ٹرمپ کے مطابق انہیں اطلاع دی گئی تھی کہ ان خواتین کو آج رات سزائے موت دی جانی تھی، تاہم اب انہیں اس سزا سے بچا لیا گیا ہے۔ انہوں نے اس پیش رفت پر ایران اور اس کی قیادت کا شکریہ بھی ادا کیا کہ ان کی درخواست کو قبول کیا گیا۔

دوسری جانب ایران کی جانب سے تاحال اس دعوے کی نہ تو تصدیق کی گئی ہے اور نہ ہی تردید سامنے آئی ہے۔ تاہم گزشتہ روز ایرانی حکام کا کہنا تھا کہ امریکی صدر کو کسی بھی خبر پر تبصرہ کرنے سے قبل اس کی تصدیق کر لینی چاہیے۔