آن لائن ادویات فروخت کرنے والی دو سے تین ویب سائٹس کو نوٹسز جاری

پاکستان ٹیلی کمیونیکیشن اتھارٹی (PTA) نے ڈرگ ریگولیٹری اتھارٹی آف پاکستان (DRAP) کی درخواست پر آن لائن پلیٹ فارمز کے ذریعے ادویات کی غیر قانونی تشہیر اور فروخت کرنے والوں کے خلاف بڑے پیمانے پر کریک ڈاؤن کا آغاز کر دیا ہے۔ اس اقدام کا بنیادی مقصد انٹرنیٹ پر غیر رجسٹرڈ، اسمگل شدہ اور انسانی صحت کے لیے مضر ادویات کی دستیابی کو روکنا ہے، جو کہ عوامی صحت کے لیے ایک سنگین خطرہ بن چکی ہیں۔

ذرائع کے مطابق پی ٹی اے نے متعدد ویب سائٹس کو نوٹسز جاری کر دیے ہیں، جن میں سے اکثر نے غیر قانونی مواد ہٹا دیا ہے، تاہم احکامات کی خلاف ورزی کرنے والے پورٹلز کو مستقل طور پر بلاک کرنے کا فیصلہ کیا گیا ہے۔