2026 کی دوسری ملک گیر انسدادِ پولیو مکمل کرلی گئی، تفصیلات جاری

پاکستان میں سال 2026 کی دوسری ملک گیر انسدادِ پولیو مہم اپنے اہداف کے حصول کے ساتھ کامیابی سے مکمل ہو گئی ہے، جس کے دوران ملک بھر کے 4 کروڑ 47 لاکھ سے زائد بچوں کو پولیو سے بچاؤ کے قطرے پلائے گئے۔ پولیو ورکرز کی انتھک محنت اور عزم کی بدولت اس وسیع مہم کو پایہ تکمیل تک پہنچایا گیا، جس کا مقصد ملک کو اس موذی وائرس سے پاک کرنا ہے۔ صوبائی اعداد و شمار کے مطابق پنجاب میں سب سے زیادہ 2 کروڑ 30 لاکھ سے زائد بچوں کی ویکسینیشن کی گئی، جبکہ سندھ میں 1 کروڑ 4 لاکھ اور خیبر پختونخوا میں 72 لاکھ 22 ہزار سے زائد بچوں تک رسائی ممکن بنائی گئی۔

بلوچستان میں 26 لاکھ 20 ہزار، اسلام آباد میں 4 لاکھ 41 ہزار، اور گلگت بلتستان میں 2 لاکھ 92 ہزار سے زائد بچوں کو پولیو کے قطرے پلائے گئے، جبکہ آزاد جموں و کشمیر میں تقریباً 7 لاکھ 17 ہزار بچوں کی ویکسینیشن مکمل کی گئی۔ یہ مہم “ڈیجیٹل پولیو ٹریکنگ” اور سخت سیکیورٹی انتظامات کے سائے میں منعقد کی گئی تاکہ ہر بچے تک رسائی کو یقینی بنایا جا سکے۔