ہر طرف بدانتظامی، اس سال برآمدات میں 7 ارب ڈالر کا نقصان ہوگا: ایس ایم تنویر

یونائیٹڈ بزنس گروپ (UBG) کے پیٹرن انچیف ایس ایم تنویر نے ملک کی معاشی صورتحال اور انتظامی امور پر سخت تشویش کا اظہار کرتے ہوئے خبردار کیا ہے کہ موجودہ مس مینجمنٹ کے باعث اس سال برآمدات میں 7 ارب ڈالر کا بڑا نقصان ہو سکتا ہے۔

ایک پریس کانفرنس سے خطاب کرتے ہوئے انہوں نے معاشی اعداد و شمار پیش کیے اور کہا کہ گزشتہ سال برآمدات 33.3 ارب ڈالر تھیں، جن میں حکومت کے 10 فیصد سالانہ اضافے کے ہدف کے برعکس کمی واقع ہو رہی ہے۔ انہوں نے بجلی کے نظام پر تنقید کرتے ہوئے انکشاف کیا کہ ملک میں 12 ہزار میگاواٹ کی گنجائش کے باوجود صرف 3 ہزار میگاواٹ بجلی استعمال ہو رہی ہے، جبکہ ٹرانسمیشن لائنز کی عدم بہتری کی وجہ سے 9 ہزار میگاواٹ ضائع ہو رہی ہے۔

ایس ایم تنویر نے انڈسٹری کی بدحالی، ٹیکسوں کی بھرمار اور سرمایے کی بیرون ملک منتقلی پر بھی بات کی۔ تاہم، انہوں نے حالیہ علاقائی پیش رفت اور امن کی کوششوں کو سراہتے ہوئے ایک بڑا بیان بھی جاری کیا۔