پن بجلی کی پیداوار میں اضافہ ،لوڈ شیڈنگ میں کمی ہوئی ہے: پاور ڈویژن کا دعویٰ

پاور ڈویژن نے خوشخبری سناتے ہوئے دعویٰ کیا ہے کہ ملک میں پن بجلی (ہائیڈل پاور) کی پیداوار میں نمایاں اضافے کی بدولت لوڈ شیڈنگ کے دورانیے میں واضح کمی ریکارڈ کی گئی ہے۔ اسلام آباد سے جاری ہونے والے اعلامیے کے مطابق، ڈیموں سے پانی کے اخراج میں اضافے نے بجلی کی صورتحال کو بہتر بنانے میں کلیدی کردار ادا کیا ہے۔

اعداد و شمار کے مطابق، اتوار کی رات ڈیموں سے پانی کا اخراج 8 ہزار کیوسک سے بڑھا کر 30 ہزار کیوسک کر دیا گیا، جس کے نتیجے میں پن بجلی کی پیداوار جو پہلے 1800 میگاواٹ تھی، بڑھ کر 4100 میگاواٹ تک پہنچ گئی۔ اس 2300 میگاواٹ کے اضافے کی بدولت ملک بھر میں لوڈ منیجمنٹ کا دورانیہ جو 6 گھنٹے تک پہنچ چکا تھا، اب کم ہو کر ڈھائی سے تین گھنٹے رہ گیا ہے۔

پاور ڈویژن کا مزید کہنا ہے کہ پن بجلی کی پیداوار بڑھنے سے سسٹم کو استحکام ملا ہے اور ملک کے جنوبی حصوں سے 400 میگاواٹ اضافی بجلی لانے میں بھی مدد ملی ہے۔ حکام نے امید ظاہر کی ہے کہ ایل این جی کی جلد دستیابی اور پانی کی طلب میں اضافے کے ساتھ پن بجلی کی پیداوار مزید بڑھے گی، جس سے لوڈ شیڈنگ کا عارضی مسئلہ مکمل طور پر ختم ہو جائے گا۔