وزن کم کرنیوالے انجیکشنز کا جگر کی صحت پر مثبت اثرات

طبی ماہرین کی جانب سے کی گئی ایک حالیہ اور اہم تحقیق میں یہ انکشاف ہوا ہے کہ وزن کم کرنے کے لیے استعمال ہونے والے مقبول انجیکشنز نہ صرف چربی گھٹاتے ہیں بلکہ جگر پر موجود سوزش اور زخموں (Scarring) کو کم کر کے اس اہم عضو کی مجموعی صحت کو بھی بہتر بنا سکتے ہیں۔ سِینائی ہیلتھ کے محققین کے مطابق، یہ بہتری اس صورت میں بھی ممکن ہے جب مریض کا وزن خاطر خواہ حد تک کم نہ ہوا ہو۔

تحقیق کے مطابق، ان ادویات میں موجود فعال جزو سیماگلوٹائیڈ (Semaglutide)، جو اوزیمپک اور ویگووی جیسے برانڈز کے نام سے دستیاب ہے، انسانی آنتوں کے ہارمون ‘جی ایل پی-1’ (GLP-1) کی نقل کرتا ہے۔ ماہرین نے دریافت کیا کہ یہ جزو جگر کے مخصوص خلیوں پر براہِ راست اثر انداز ہونے کی صلاحیت رکھتا ہے، جس سے جگر کی خرابی اور میٹابولک مسائل میں نمایاں کمی آتی ہے۔

یہ دریافت خاص طور پر ان مریضوں کے لیے امید کی کرن ہے جو میٹابولک ڈس فنکشن اسٹیٹو ہیپاٹائٹس (MASH) یعنی جگر میں چکنائی کی زیادتی سے پیدا ہونے والی پیچیدہ بیماری میں مبتلا ہیں۔ برطانیہ میں لگ بھگ 30 لاکھ افراد اس مرض کا شکار ہیں، جس کا روایتی علاج صرف وزن میں کمی بتایا جاتا ہے۔ تاہم، محققین کا کہنا ہے کہ یہ انجیکشنز جگر کو ایسے منفرد طریقوں سے فائدہ پہنچاتے ہیں جو محض وزن کم کرنے سے ممکن نہیں ہوتے، بلکہ یہ خلیاتی سطح پر جگر کی مرمت کا کام کرتے ہیں۔