پاکستان سٹاک مارکیٹ میں کاروبار کا گرین زون میں آغاز

گزشتہ روز کی شدید مندی کے بعد پاکستان سٹاک مارکیٹ میں آج کاروبار کا آغاز انتہائی مثبت انداز میں ہوا ہے، جہاں سرمایہ کاروں کی دلچسپی کے باعث ہنڈرڈ انڈیکس ‘گرین زون’ میں داخل ہو گیا۔ کاروباری ہفتے کے دوسرے روز آغاز سے ہی سٹاک ایکسچینج میں زبردست تیزی ریکارڈ کی گئی اور انڈیکس میں 4000 سے زائد پوائنٹس کا اضافہ دیکھنے میں آیا۔ اس تیزی کے نتیجے میں کے ایس ای (KSE) 100 انڈیکس ایک لاکھ 60 ہزار 591 کی سطح سے اچھل کر ایک لاکھ 64 ہزار 683 پوائنٹس پر پہنچ گیا ہے۔ یاد رہے کہ گزشتہ کاروباری روز امریکی ناکہ بندی کی خبروں کے باعث انڈیکس 6600 پوائنٹس گر گیا تھا، تاہم آج مارکیٹ نے اپنی کھوئی ہوئی پوزیشن بڑی حد تک بحال کر لی ہے۔

پاکستان کے ساتھ ساتھ ایشیائی مارکیٹوں میں بھی آج خوش آئند استحکام اور تیزی دیکھنے میں آئی ہے۔ آبنائے ہرمز میں جاری کشیدگی کے باوجود عالمی سرمایہ کاروں کے اعتماد میں بہتری ریکارڈ کی گئی ہے۔ جاپان کے نکی (Nikkei) انڈیکس میں ڈھائی فیصد سے زائد کا نمایاں اضافہ ہوا، جبکہ تھائی لینڈ کے سیٹ انڈیکس میں بھی ایک فیصد کی تیزی دیکھی گئی۔ اسی طرح چین کا شنگھائی کمپوزٹ انڈیکس 0.55 فیصد اور ہانگ کانگ کا ہینگ سینگ انڈیکس 0.43 فیصد اضافے کے ساتھ ٹریڈ کرتے رہے۔ ملائیشیا کے فٹسی برسا انڈیکس میں بھی معمولی بہتری آئی ہے، جو اس بات کی عکاسی کرتی ہے کہ مارکیٹ نے فی الحال جنگی خدشات کو پسِ پشت ڈال دیا ہے۔

معاشی ماہرین کا کہنا ہے کہ اسٹاک مارکیٹ میں یہ اچانک واپسی سرمایہ کاروں کی جانب سے ‘ڈپ’ پر خریداری اور عالمی سفارتی کوششوں پر اعتماد کا نتیجہ ہو سکتی ہے۔ اگرچہ مشرقِ وسطیٰ کی صورتحال تاحال غیر یقینی ہے، لیکن ایشیائی منڈیوں میں ریکوری نے مقامی سرمایہ کاروں کو بھی حوصلہ دیا ہے، جس سے پاکستان اسٹاک ایکسچینج میں کاروباری سرگرمیوں کو نئی جلا ملی ہے۔ ماہرین کے مطابق اگر علاقائی کشیدگی میں کمی آتی ہے تو انڈیکس آنے والے دنوں میں مزید نئی بلندیاں چھو سکتا ہے۔