زیادہ یا کم نیند دماغی صحت کیلئے خطرناک، ڈیمینشیا کا خدشہ بڑھنے کا انکشاف

ایک نئی طبی تحقیق میں انکشاف کیا گیا ہے کہ نیند کی کمی یا حد سے زیادہ نیند دونوں دماغی صحت کیلئے نقصان دہ ہیں اور ڈیمینشیا جیسے مرض کے خطرے میں اضافہ کر سکتی ہیں۔

جرنل پلس ون میں شائع ہونے والی اس تحقیق میں 69 سائنسی رپورٹس کا تجزیہ کیا گیا، جن میں مختلف عمر کے افراد شامل تھے۔ تحقیق کے مطابق نیند کے معمولات دماغی کارکردگی اور یادداشت پر براہ راست اثر ڈالتے ہیں۔

تحقیق میں بتایا گیا کہ روزانہ 7 گھنٹے سے کم نیند لینے سے ڈیمینشیا کا خطرہ 18 فیصد تک بڑھ جاتا ہے، جبکہ 8 گھنٹے سے زائد نیند لینے والے افراد میں یہ خطرہ 28 فیصد تک زیادہ پایا گیا۔

اسی طرح تحقیق میں یہ بھی سامنے آیا کہ باقاعدہ جسمانی سرگرمیاں دماغی صحت کو بہتر بناتی ہیں اور ڈیمینشیا کے خطرے کو تقریباً 25 فیصد تک کم کر سکتی ہیں۔

ماہرین نے کہا کہ زیادہ دیر تک بیٹھے رہنے والے افراد میں بھی دماغی بیماریوں کا امکان بڑھ جاتا ہے، اس لیے متوازن طرز زندگی اختیار کرنا ضروری ہے۔

انہوں نے زور دیا کہ دماغی صحت کے تحفظ کیلئے روزانہ 7 سے 8 گھنٹے کی معیاری نیند انتہائی اہم ہے۔