امریکی سینیٹر ایڈورڈ مارکی کی ڈائریکٹر ورلڈ بوسٹن شاہد خان سے ملاقات، امن عمل کیلئے خراجِ تحسین

امریکی سینیٹر ایڈورڈ جے مارکی نے ورلڈ افیئرز کونسل آف بوسٹن (ورلڈ بوسٹن) کے بورڈ آف ڈائریکٹرز کے رکن شاہد خان سے ان کی رہائش گاہ پر ملاقات کی، جہاں انہوں نے مشرقِ وسطیٰ میں امن کے فروغ اور بین الثقافتی ہم آہنگی کے لیے تنظیم کی کاوشوں کی بھرپور تعریف کی۔ اس پروقار تقریب میں میئر چارلیز سیٹسکی، ورلڈ بوسٹن کے چیئرمین جیمز ڈی ویلس، صدر جو ہائنس اور سی ای او سارا سبلی سمیت مہرین، منظر خدا داد اور دیگر اہم سیاسی و سماجی شخصیات نے شرکت کی۔ شرکاء نے عالمی سطح پر سفارتی روابط اور بات چیت کو فروغ دینے کے لیے ورلڈ بوسٹن کے پلیٹ فارم کو خراجِ تحسین پیش کیا۔

سینیٹر ایڈورڈ مارکی نے اپنے خطاب میں کہا کہ ورلڈ بوسٹن جیسی تنظیمیں دیرپا امن کے لیے ضروری باہمی تعلقات پیدا کرنے میں کلیدی کردار ادا کرتی ہیں۔ انہوں نے شاہد خان کی قیادت میں کمیونٹی کی سطح پر کی جانے والی سفارتی کوششوں کو سراہا۔ شاہد خان نے سینیٹر کے دورے پر شکریہ ادا کرتے ہوئے اس بات پر زور دیا کہ خطے میں منصفانہ اور پائیدار امن کے لیے شہری شمولیت اور باہمی احترام پر مبنی مکالمہ وقت کی ضرورت ہے۔

تقریب سے خطاب کرتے ہوئے تنظیم کے چیئرمین جیمز ڈی ویلس نے کہا کہ ورلڈ بوسٹن کا مقصد مختلف نقطہ نظر رکھنے والے افراد کو ایک پلیٹ فارم پر اکٹھا کرنا ہے تاکہ عالمی مسائل کا حل مل کر تلاش کیا جا سکے۔ واضح رہے کہ ورلڈ بوسٹن ایک غیر جانبدار تنظیم ہے جو تعلیمی پروگراموں اور عوامی فورمز کے ذریعے گریٹر بوسٹن کو دنیا سے جوڑنے اور عالمی فہم و ادراک کو عام کرنے میں اہم کردار ادا کر رہی ہے۔ اس تقریب کو مشرقِ وسطیٰ میں جاری امن عمل کے تناظر میں ایک اہم سفارتی پیش رفت قرار دیا جا رہا ہے۔