عالمی منڈی میں خام تیل کی قیمتوں میں بڑی گراوٹ: برینٹ اور ڈبلیو ٹی آئی 100 ڈالر سے نیچے آ گئے

امریکہ اور ایران کے درمیان دو ہفتوں کی جنگ بندی کے اعلان کے ساتھ ہی عالمی معیشت کے لیے بڑی خوشخبری سامنے آئی ہے اور عالمی منڈی میں خام تیل کی قیمتیں یکدم 100 ڈالر کی سطح سے نیچے گر گئی ہیں۔ جنگ کے بادل چھٹنے اور سپلائی چین بحال ہونے کی امیدوں کے باعث خام تیل کی قیمتوں میں 15 فیصد تک کی نمایاں کمی ریکارڈ کی گئی ہے۔ اس بڑی گراوٹ کے نتیجے میں عالمی منڈی میں کاروبار کے دوران ‘ڈبلیو ٹی آئی’ (WTI) کی قیمت 14.32 فیصد کمی کے بعد 96 ڈالر 97 سینٹس فی بیرل پر آگئی ہے۔

اسی طرح عالمی معیار سمجھے جانے والے برطانوی ‘برینٹ کروڈ’ کی قیمت میں بھی 12.48 فیصد کی کمی دیکھی گئی ہے، جس کے بعد برینٹ 95 ڈالر 63 سینٹس فی بیرل کی سطح پر ٹریڈ ہو رہا ہے۔ معاشی ماہرین کا کہنا ہے کہ مشرقِ وسطیٰ میں کشیدگی کم ہونے اور آبنائے ہرمز کے کھلنے کے امکانات نے سرمایہ کاروں کا اعتماد بحال کیا ہے، جس سے توانائی کی قیمتوں میں استحکام آنے کا امکان ہے۔ تیل کی قیمتوں میں اس بڑی کمی سے پاکستان سمیت پیٹرولیم مصنوعات درآمد کرنے والے ممالک کو اپنی معیشت سنبھالنے اور مہنگائی کی شرح میں کمی لانے میں بڑی مدد ملے گی۔