کینسر ہسپتال کی تعمیر 3 شفٹوں میں مکمل کی جائے: مریم نواز

وزیراعلیٰ پنجاب مریم نواز شریف نے نواز شریف انسٹیٹیوٹ آف کینسر ٹریٹمنٹ اینڈ ریسرچ کا تفصیلی دورہ کیا اور منصوبے کی جلد از جلد تکمیل کے لیے تعمیراتی کام تین شفٹوں میں مکمل کرنے کی ہدایت جاری کی ہے۔ دورے کے دوران انہوں نے ہسپتال کے مختلف شعبوں بشمول مرکزی داخلی ہال، ریڈیالوجی، میموگرافی سوئٹ، سی ٹی سکین روم اور ریڈیالوجی تھراپی کا معائنہ کیا۔ مریم نواز نے ٹریٹمنٹ پلاننگ روم، سیمولیٹر اور اے ایچ یو روم کی کارکردگی کا بھی جائزہ لیا اور مریضوں کے لیے اسٹیٹ آف دی آرٹ ویٹنگ ایریاز کی فراہمی کو یقینی بنانے کی تاکید کی۔ وزیراعلیٰ نے ہسپتال کے ڈین، ڈائریکٹر اور دیگر کلیدی آسامیوں پر بہترین پروفیشنلز کی تعیناتی کا حکم دیتے ہوئے واضح کیا کہ پنجاب حکومت کینسر کے مریضوں کو عالمی معیار کے مطابق جدید ترین طبی سہولیات فراہم کرنے کے لیے پرعزم ہے تاکہ ہر مریض کو بہترین علاج میسر آ سکے۔