عالمی شپنگ کمپنیوں کا اعتماد بحال، گوادر پورٹ پر تجارتی سرگرمیاں تیز

وفاقی وزیر بحری امور محمد جنید انوار چودھری نے گوادر پورٹ پر تجارتی سرگرمیوں کے بڑھتے ہوئے رجحان کو اس کی سٹریٹجک اہمیت کا واضح ثبوت قرار دیتے ہوئے بتایا ہے کہ حالیہ دنوں میں 14,629 میٹرک ٹن کارگو لے کر ‘ایم وی ریوا گلوری’ کی آمد عالمی شپنگ کمپنیوں کے بحال ہوتے اعتماد کی عکاسی کرتی ہے۔ وزیر بحری امور کا کہنا تھا کہ گوادر پورٹ تیزی سے خطے میں ٹرانزٹ اور ٹرانس شپمنٹ تجارت کے اہم مرکز کے طور پر ابھر رہی ہے، جسے عالمی معیار کا میرین گیٹ وے بنانے کے لیے حکومت تمام تر ضروری سہولیات اور مؤثر اقدامات یقینی بنا رہی ہے۔ انہوں نے مزید کہا کہ کارگو جہازوں کی آمد میں مسلسل اضافہ بندرگاہ کی اہمیت کو مزید اجاگر کر رہا ہے، جو نہ صرف ملکی معیشت بلکہ علاقائی تجارتی رابطوں کے لیے بھی سنگ میل ثابت ہوگا۔